Senator barlyq óńirde teri men júndi qabyldaýdyń pýnktterin qurýdy usyndy

NUR-SULTAN. QazAqparat - Otandyq toqyma jún ónimderin óndirýshiler kúrdeli shıkizat tapshylyǵyn bastan keship otyrǵanda, jún óndirýshiler qarapaıym jáne tıimdi tehnologııalarǵa, sondaı-aq óndirilgen shıkizatty qaıta óńdeıtin bıznesti qoldaýǵa muqtaj bolyp otyr. Bul týraly senator Muhtar Jumaǵazıev elimizdiń Premer-Mınıstriniń atyna joldaǵan depýtattyq saýalynda aıtty, dep habarlaıdy QazAqparat tilshisi.

Qoı ósirýmen elimizde 4 myńǵa jýyq aýyl sharýashylyǵy taýarlaryn óndirýshiler aınalysady, al jún óńdeıtin zaýyty nebári - 13. Sonymen birge, qolda bar derekter boıynsha, suranystyń joqtyǵynan nemese shıkizat bolmaǵandyqtan ótken jyly jún óńdeıtin 6 kásiporyn jumys istegen joq, al istep turǵan 7 kásiporynnyń júktelýi jalpy alǵanda 30%-dy ǵana quraǵan.

«Otandyq alyp-satarlar tek bııazy qoı júniniń bir kelisin 100-150 teńgeden qabyldaıdy. Al bir qoıdy qyrqýǵa ketetin shyǵyn 300-500 teńgege deıin. Onyń ústine júndi ótkizý máselesi de jolǵa qoıylmaǵanyna baılanysty sharýalar órtep jiberýge májbúr»,- dep atap ótti M. Jumaǵazıev Senattyń jalpy otyrysynda.

Depýtattyń aıtýynsha, qazir jún óńdeý kásiporyndaryn aýmaqtyq bólý tásilderin qaıta qurý jáne jańa tehnologııalyq óndirister qurý mańyzdy. Senator osyndaı sharýalarǵa memlekettik qoldaý sharalaryn jetildirýdi usyndy. Eldi ındýstrııalyq-ınnovatsııalyq damytýdyń 2020-2025 jyldarǵa arnalǵan memlekettik baǵdarlamasy aıasyndaǵy ınvestıtsııalyq sýbsıdııalar osy salaǵa jergilikti, sondaı-aq sheteldik ınvestıtsııalar aǵynyn yntalandyrýǵa múmkindik beredi.

«Sala mamandarynyń pikirinshe, osyndaı jaǵdaı jún óńdeý máseleleri eki ýákiletti organǵa tıesili bolýynan týyndap otyr. Máselen, shıkizat óndirý jáne teri men júndi bastapqy óńdeý máseleleri Aýyl sharýashylyǵy mınıstrliginiń quzyryna jatady, al tereń óńdeý Indýstrııa jáne ınfraqurylymdyq damý mınıstrligine qaraıdy. Nátıjesinde, iske asyrylatyn ınvestıtsııalyq preferentsııalar men memlekettik qoldaý sharalary bir-birin jalǵastyryp, tolyqtyrmaıdy, keıbir máseleler boıynsha belgili bir qıyndyqtardy da týǵyzyp otyr»,- dedi depýtat.

Senator sondaı-aq jaǵdaıdy jaqsartý úshin birqatar usynystar aıtty. Olardyń ishinde Aýyl sharýashylyǵy mınıstrligine qoldanystaǵy agroónerkásiptik keshendi memlekettik qoldaý baǵdarlamalaryna teri men júndi tereń óńdeý jónindegi jobalardy engizý boıynsha ókilettikter berý. Sondaı-aq, ol osy saladaǵy jobalardy sýbsıdııalaý jáne qoı sharýashylyǵy sharýashylyqtary men turǵyndardan jún satyp alýdyń ortalyqtandyrylǵan júıesin uıymdastyrý maqsatynda elimizdiń barlyq óńirinde teri men júndi qabyldaý boıynsha servıstik-daıyndaý pýnktterin qurý týraly máselelerdi qozǵady.