Senator azamattyq avıatsııadaǵy máselelerdi atady

<p>ASTANA. KAZINFORM &ndash; Búgin Senattyń jalpy otyrysynda depýtat Nurtóre Júsip óziniń depýtattyq saýalynda Úkimetke azamattyq avıatsııanyń negizgi problemalaryna erekshe nazar aýdarýdy usyndy.</p>

Ol osy salanyń qaýipsizdigi men básekege qabilettiligin arttyrýǵa baǵyttalǵan keshendi sharalar ázirleý jáne iske asyrý úshin Kólik mınıstrligi men Ǵylym jáne joǵary bilim mınıstrligi ózara tyǵyz is-qımyl jasaý qajet ekenin atap ótti.

- Áýejaılardyń ınfraqurylymynyń álsizdigi, bıýdjettik tasymaldaýshylardyń ishki naryqtaǵy usynystarynyń jetkiliksizdigi, janarmaı baǵasynyń jáne ushý bıletteriniń qymbattyǵy sııaqty keshendi problemalar jetkilikti. Osylardyń ishinde eń mańyzdysynyń biri - azamattyq avıatsııa salasynda halyqaralyq talaptarǵa saı keletin mamandardy ázirleý máselesi. Tsıfrlandyrýdy, jasandy ıntellektini jáne pılotsyz júıelerdi qosa alǵanda, tehnologııalardyń qarqyndy damýy salanyń serpindi ózgeristerine beıimdele alatyn ozyq oıly kadrlardy daıarlaýdy talap etip otyr. Mamandardy daıarlaýdyń joǵary deńgeıin qamtamasyz etý úshin álemdik standarttar men ozyq tájirıbelerge sáıkes Akademııanyń ınfraqurylymyn damytý asa qajet, - dedi Nurtóre Júsip Úkimet basshysy Oljas Bektenovtiń atyna joldaǵan saýalynda.

Depýtat jaǵdaıdy jaqsartý úshin birqatar naqty sharalardy usyndy. Atap aıtqanda, bul EASA standarttary boıynsha Azamattyq avıatsııa akademııasyn sertıfıkattaý jáne ýaqyt talabyna jaýap beretin mamandardy daıarlaý úshin ushqyshsyz avıatsııa ortalyǵyn qurý týraly.

- Akademııaǵa mamandandyrylǵan jabdyqtary bar jeke aerodrom salý, oqý-zerthanalyq bazany jańartý jáne keńeıtý boıynsha jobalardy iske asyrý, zamanaýı trenajerlarmen jaraqtandyrý qajet. Avıatsııa salasynyń básekege qabilettiligin arttyrý mańyzdy. Ol úshin nysanaly qarjylandyrý normasyn engizýdi qarastyrý qajet. Mundaı praktıka bizde bolǵan. Biz ǵylymdy qarjylandyrýda Qazaqstandaǵy jer qoınaýyn paıdalanýshylardy óndirýge jumsalǵan óz shyǵyndarynyń ǵylymı-zertteý jáne tájirıbelik-konstrýktorlyq jumystarǵa bólýin mindettegen bolatynbyz. Akademııanyń eldiń avıatsııa salasynyń qaýipsizdigi men básekege qabilettiligin qamtamasyz etetin kadrlardy daıarlaýdyń strategııalyq ortalyǵy retindegi rólin kúsheıtý úshin oǵan erekshe mártebe berý máselesin qarastyrý qajet dep oılaımyn», - dedi senator.

Budan buryn habarlanǵandaı, búgin Senattyń jalpy otyrysynda Eýropa qaıta qurý jáne damý bankine qatysty eki qujat maquldandy.

Sondaı-aq 2030 jylǵa deıin kólik ınfraqurylymyn jaqsartýǵa 9 trln-nan astam teńge ınvestıtsııa salynatyny aıtyldy.