Senator aýyl sharýashylyǵy tehnıkasynyń qanshalyqty eskirgenin aıtty

NUR-SULTAN. QazAqparat – Traktor parkiniń 80 paıyzynyń, kombaın parkiniń 76 paıyzynyń qoldaný merzimi 10 jyldan asyp ketti. Bul týraly Senatta aýyl sharýashylyǵy tehnıkasy taqyrybyna arnalǵan dóńgelek ústel otyrysynda depýtat Muhtar Jumaǵazıev aıtty, dep habarlaıdy QazAqparat tilshisi.

«Qazaqstanda óndirýshilerdiń kúsh-jigeri men shyǵarylymynyń ósýine qaramastan, aýyl sharýashylyǵy tehnıkasyn óndirý salasyn damytý máselesi jan-jaqty zertteýdi talap etedi. Atap aıtqanda, aýyl sharýashylyǵy tehnıkasyn damytý barysynda jıi kezdesetin ózekti máseleler: qoldanystaǵy tehnıkanyń eskirýi, kádege jaratý, ınvestıtsııalyq jáne syıaqy stavkasyn sýbsıdııalaý, tehnıkany lızıngke berý, el aýmaǵynda tehnıka jasap shyǵaratyn mekemelerdiń tapshylyǵy, sondaı-aq búginde valıýta naryǵynyń turaqsyzdyǵyna baılanysty ımporttyq tehnıkanyń 1-1,5 esege qymbattaýy», - dedi M. Jumaǵazıev.

Onyń aıtýynsha, 2022 jyldyń 1 qańtaryndaǵy jaǵdaı boıynsha traktor parkiniń - 80 paıyzy, kombaın parkiniń - 76 paıyzynyń qoldaný merzimi 10 jyldan asyp ketken.

Bul óz kezeginde aýyl sharýashylyǵy jumystaryn júrgizý merziminiń sozylýyna ákep soǵady.

«Bul jaǵdaı ónimniń azaıýy, qosymsha eńbekaqy tóleý men basqa da shyǵyndarǵa májbúrleıdi», - dedi senator.