Senator áskerı qyzmetshilerge arnalǵan jeńildikterdi qaıtarýdy usyndy

<p>ASTANA. KAZINFORM &ndash; Qazaqstannyń ulttyq qaýipsizdigin qamtamasyz etýde Qarýly Kúshter sheshýshi ról atqarady. Sondyqtan bul saladaǵy kúrdeli problemalar shuǵyl sheshimdi talap etip otyr. Osy oraıda senator Andreı Lýkın Premer-Mınıstr Oljas Bektenovtiń atyna tıisti depýtattyq saýal joldady.</p>

Depýtattyń aıtýynsha, qazirgi jaǵdaıǵa taldaý kezinde buryn áskerı qyzmetkerlerge berilgen kóptegen áleýmettik jeńildik joıylǵanyn nemese jaqsy jaqqa ózgermegeni anyqtalǵan.

«Qazirgi kezdegi qaýip-qaterdi, álemde bolyp jatqan áleýmettik-saıası protsesterdi eskere otyryp, Úkimet áskerı qyzmetshilerdi áleýmettik qamsyzdandyrýdy jaqsartý jóninde kezeń-kezeńimen sharalar qabyldaý máselesin pysyqtaýy qajet. Áskerı qyzmetshiler men olardyń otbasy músheleriniń temirjol kóligimen jylyna bir ret demalysqa barý jáne keri qaıtýda tegin jol júrý, qoǵamdyq kólikpen, qalalyq, qala mańyndaǵy jáne jergilikti osyndaı kóliktermen tegin júrý kerek. Sondaı-aq daladaǵy jattyǵý tólemderin berý, kommýnaldyq qyzmetterdi 50%-ǵa óteý sııaqty áskerı qyzmetshilerdiń áleýmettik jeńildikterine basymdyq berý qajet», - dedi Andreı Lýkın.

Osy máselelerdi sheshý úshin «Áskerı qyzmet jáne áskerı qyzmetshilerdiń mártebesi týraly» Zańǵa tıisti ózgerister men tolyqtyrýlar engizý qajet.

Senator atalǵan jeńildikterdi qabyldaý áskerı qyzmettiń tartymdylyǵyn arttyrady jáne Qarýly Kúshterdiń, basqa áskerler men áskerı quralymdardyń ımıdjin aıtarlyqtaı kóteredi dep sanaıdy.