Senator «ArselorMıttal Temirtaý» kompanııasynda apat kóbeıip bara jatqanyn eskertti
Senator elimizdiń ónerkásip kásiporyndarynda apat týyndaý qaýpiniń deńgeıi burynǵysynsha joǵary ekenin aıtty. 7 qarashada «ArselorMıttal Temirtaý» aktsıonerlik qoǵamynyń «Abaı» shahtasynda apat bolyp, 6 kenshi qaza tapty, ekeýi zardap shekti.
Depýtat aıtqan aqparat boıynsha sońǵy 10 jylda «ArselorMıttal Temirtaý» metallýrgııalyq kompanııasynyń barlyq bólimshelerinde apat sany kóbeıip barady. Osy ýaqyt ishinde kompanııanyń kómir shahtalarynda 23 apat boldy, odan 41 adam zardap shekti, onyń 19-y qaza boldy. Bul 2006 jáne 2008 jyldardaǵy eki iri apatty eseptemegendegi jaǵdaı, onda 71 shahter qaza tapqan bolatyn.
Sergeı Ershov ónerkásiptegi qaýipsizdiktiń jaı-kúıin jaqsartý úshin qazirgi kezde osy kásiporynda da, búkil memleket aýqymynda da úkimettik deńgeıde sharalar qabyldaý mańyzdy dep sanaıdy.
Senator sondaı-aq kompanııada ınvestıtsııalyq mindettemelerdiń oryndalmaýy, qyzmetkerlerdiń tıisti áleýmettik kepildikteriniń bolmaýy, jabdyqtardy jańǵyrtýdyń tolyq qarjylandyrylmaýy, bilikti kadrlardyń ketýi, sondaı-aq zııandy zattar shyǵaryndylaryn azaıtý jónindegi mindettemelerdiń oryndalmaýǵa qatysty birqatar ózekti máseleler bar ekenin atap ótti.
«Úkimetti qabyldanǵan mindettemelerdi múltiksiz saqtaýǵa jáne apat pen ólimge dýshar etetin jaraqattaný sanynyń óse túsýine yqpal etetin jaǵdaıdy boldyrmaýǵa shaqyra otyryp, ózderiniń jeke otyrysynda salanyń jaǵdaıyn jáne «Arselordyń» jaı-kúıin qaraýdy suraımyz. Qaýipti óndiris obektilerinde ónerkásip qaýipsizdigin qamtamasyz etý jónindegi naqty jáne júıeli sharalar, sondaı-aq qyzmetkerlerdiń áleýmettik ahýaly men óńirdegi ekologııalyq jaǵdaıdy jaqsartý jóninde Arselormen ınvestıtsııalyq kelisimdi qaıta qaraý týraly sharalar usynatyn bolsyn», - dedi Sergeı Ershov óz saýalynda.
Depýtat osy máselelerdi qaraý barysynda kásiporyndardyń óndiristik jáne ekonomıkalyq basymdyqtarynan azamattardyń qaýipsizdigi negizgi qaǵıdatqa ári basymdyqqa aınalýy tıis ekenin atap ótti. Al qaýipti óndiris obektileri qyzmetiniń barlyq salalary men barlyq kezeńderinde ónerkásip qaýipsizdiginiń talaptary eń basty, jalpyǵa birdeı jáne bólinbes bólshegi bolyp belgilenýi tıis.