Senator Andreı Lýkın Astanada birneshe kezdesý ótkizdi

ASTANA. QazAqparat – Parlament Senatynyń depýtaty Andreı Lýkın Astana qalasy máslıhatynyń depýtattarymen jáne elorda turǵyndarymen kezdesti, dep habarlaıdy QazAqparat Palatanyń baspasóz qyzmetine silteme jasap.

Kezdesýde máslıhat depýtattary birinshi jartyjyldyq qorytyndysy boıynsha atqarylǵan jumystar týraly aıtty.

Andreı Lýkın Senatta júrgizilip jatqan zańnamalyq jumystyń barysy týraly habardar etti.

«Parlament VIII shaqyrylymnyń I sessııasy barysynda jalpy alǵanda 25 zań aktisin qabyldady. Sondaı-aq, «Óńir» depýtattyq tobynyń jumysy qarqyn ala tústi jáne quramy jańartyldy. Jergilikti ókildi organdarmen ózara is-qımyl jónindegi keńes qaıta uıymdastyryldy, onyń quramyna máslıhattardyń barlyq tóraǵalary enetin boldy. Keńestiń maqsaty men mindeti de naqtylandy. Sonymen qatar, 30 naýryzda Senat tóraǵasynyń tóraǵalyq etýimen «Óńir» depýtattyq tobynyń jańartylǵan quramdaǵy birinshi otyrysy ótti. Onda senatorlar VIII saılanǵan Parlamenttiń I sessııasynyń ashylýy barysynda Memleket basshysy Q.K. Toqaevtyń elimiz Parlamenti men Úkimetiniń aldyna qoıǵan mindetterin talqylady», - dep atap ótti Andreı Lýkın.

Senator Astana qalasyndaǵy Esil, Almaty, Baıqońyr, Saryarqa jáne Nura aýdandary prokýratýralarynyń qyzmetkerlerimen de kezdesti. Olardyń qyzmetimen, materıaldyq tehnıkalyq jabdyqtalýymen, elorda aýdandaryndaǵy qadaǵalaý mekemesi men quqyqtyq tártiptiń jumysymen tanysty.

Depýtat Andreı Lýkın bıylǵy naýryz aıynan bastap parlamenttik korpýs pen Bas prokýratýranyń birlese otyryp nátıjeli jumys atqarǵanyn atap ótti.