Senator Abaı oblysynda jylý berý jelisiniń 65 paıyzy tozǵanyn aıtty

ASTANA. QazAqparat – Senator Baqytjan Baıahmetov elimizdiń Premer-Mınıstri Álıhan Smaıylovtyń atyna joldaǵan depýtattyq saýalynda jylý jáne elektr energetıka nysandaryn qaıta jańǵyrtý máselesin kóterdi, dep habarlaıdy QazAqparat tilshisi.

«Statıstıka derekterine sáıkes, Abaı oblysy boıynsha jylý berý jelileriniń jalpy tozýy – 65 paıyz. Bul – eldegi eń joǵary kórsetkish. Osy jaǵdaı jylý berý kezeńinde jylý qýatynyń tapshylyǵy men avarııalyq jaǵdaılarǵa sebep bolady jáne jumysta tehnologııalyq úzilisterge ákelip soǵady», - dedi B. Baıahmetov.

Depýtat Memleket basshysy Qasym-Jomart Toqaevtyń Abaı oblysyna jumys sapary barysynda ınfraqurylym máselelerine, onyń ishinde zamanaýı jylý elektr ortalyǵyn salýǵa erekshe nazar aýdarǵanyn eske saldy.

Senator Úkimetke Semeı qalasyndaǵy JEO-3 qurylysy boıynsha jumys tobynyń quramyn naqtylaýdy, sondaı-aq jylýmen qamtý nysandaryn qarjylandyrý máselelerin pysyqtaýdy usyndy.

«Bıýdjet qarajatyn paıdalanýdy ońtaılandyrý maqsatynda jylý energetıka júıesin retteý salasyndaǵy fýnktsııalardy bir memlekettik organǵa ortalyqtandyrý múmkindigin qarastyrýdy jáne JEO-3 qurylysy boıynsha jumys tobynyń quramyn jańartyp, onyń quramyna Parlament depýtattaryn qosýdy usynamyz», - dedi B. Baıahmetov.