Senator: 2040 jylǵa qaraı Qazaqstanda sý tapshylyǵy 50%-ǵa jetýi múmkin

NUR-SULTAN. QazAqparat - Senator Ábdáli Nuralıev Premer-Mınıstr Asqar Mamınniń atyna depýtattyq saýal joldady. Ol saýalynda sý tapshylyǵyna baılanysty problemalardy kóterdi, dep habarlaıdy QazAqparat tilshisi.

Senator aıtqan aqparat boıynsha, Qazaqstanda 2040 jylǵa qaraı aýyz sý 50%-ǵa deıin tapshy bolýy múmkin.

Elimizdiń taý kólderine «Qazgıdromet» júrgizgen kóp jyldyq baqylaý nátıjesi boıynsha ótken jyly qar jamylǵysy aıtarlyqtaı tómendegeni anyqtalyp otyr. Osyǵan baılanysty bizdiń elimizdiń jáne kórshi memleketterdiń kóptegen sý qoımalarynda sý deńgeıi turaqty túrde tómendep keledi jáne bul úrdis sońǵy úsh jyl boıy saqtalýda.

Senator óziniń depýtattyq saýalynda birqatar naqty qadamdardy usyndy, olardyń oryndalýy osy máseleni sheshýge kómektesýi tıis.

«Sý resýrstarynyń boljamdy tapshylyǵyn azaıtý maqsatynda elimizde jer asty sý qorlaryn zertteý men qaıta baǵalaýdy jandandyrý qajet. Sondaı-aq, uńǵymalardy qazýǵa bólinetin sýbsıdııalardyń kólemin ulǵaıtý kerek. Odan basqa, Qazaqstannyń birqatar oblystaryn sýmen qamtamasyz etip otyrǵan Shý jáne Talas ózenderiniń boıynan Qyrǵyz Respýblıkasynyń «Býrýldaı» sý qoımasy men «Bala-Sarýý» GES-in salý josparlaryna baılanysty tıisti sharalardy qaraý qajet», - dedi Ábdáli Nuralıev.