Senatqa óńdeý ónerkásibine jaýapty vedomstvolardyń basshylary shaqyrylady – Máýlen Áshimbaev

<p>Búgin Senattyń jalpy otyrysynda depýtat Súıindik Aldashev elimizdegi óńdeý ónerkásibiniń problemalaryn kóterdi. Osy oraıda Ónerkásip jáne qurylys mınıstri Qanat Sharlapaevtyń atyna saýal joldady, dep habarlaıdy <a href="Kazinform" target="_blank" rel="noopener">Kazinform</a>.</p>

Ol óziniń depýtattyq saýalynda basymdyq berilgen joǵary deńgeıde óńdeý klasterin qurý jónindegi 15 iri joba boıynsha mınıstrlik jumysyndaǵy kemshilikterdi atap ótti.

Senator sarapshylarmen, ónerkásip mamandarymen kezdesýler barysynda serpindi jobalardy iske asyrýda problemaly úsh blog anyqtalǵanyn jetkizdi. Birinshisi – ol bazalyq máseleler. Bul turǵyda shıkizatpen ári resýrstarmen qamtamasyz etý, ınfraqurylymdy tartý, jobalardy júzege asyrýǵa arnalǵan alańdardy daıarlaý jumystary qamtylýy tıis.

«Problemalardyń osy blogyndaǵy kemshilikterdi sheshý aıryqsha mańyzdy, sebebi jobalardy iske asyrýdyń bastalýy solardyń sheshimine tikeleı baılanysty. Birinshiden, kásiporyndarǵa jetkilikti kólemde jáne tıisti baǵadaǵy shıkizatty jetkizý, sondaı-aq olardy qajet resýrstarmen qamtamasyz etý máselesi ashyq kúıinde qaldy. Normatıvtik baza jetildirýdi talap etedi. Qazir otandyq óndiriste qaıta óńdelgen ımporttyq shıkizat pen komponentter áli de basym ekeni jasyryn emes. Qoldanystaǵy «Ónerkásiptik saıasat týraly» zań Memleket basshysynyń qazaqstandyq taýar óndirýshilerdi shıkizatpen qamtamasyz etý jónindegi tapsyrmasynyń oryndalýyna yqpal ete almaı jatyr», - dedi S. Aldashev.

Senator problemalardyń ekinshi blogyn belgiledi. Bul rette, júzege asyrý protsesinde ozyq tehnologııalardy qoldaný máselesin sheship, qarjylandyrý kózderi men joba operatorlaryn anyqtaý kerek. Al úshinshi blokta Qazaqstan ekonomıkasyna qajet ónimdi aıqyndaý, taýardy eksportqa tasymaldaý jáne ótkizý sııaqty marketıngtik problemalar belgilendi.

«Jobalardy josparlaý jáne iske asyrý barysynda joǵaryda atalǵan bazalyq, iske asyrý jáne marketıngtik problemalar qalaı eńseriledi? Senatorlarda Úkimet 15 serpindi jobany júzege asyrýǵa daıyn ba degen suraq bar», - dedi senator.

Bul turǵyda Senat tóraǵasy Máýlen Áshimbaev depýtat óte mańyzdy máseleni kóterip otyrǵanyn aıtty.

«Senat reglamentiniń erejesine sáıkes, saýaldyń jaýabyn palatanyń otyrysynda tyńdaý josparlanyp otyr. Osy rette, jaqyn aradaǵy bir otyrysymyzǵa múddeli mınıstrlikterdiń basshylyǵy arnaıy shaqyrylady. Depýtattyq saýaldyń jaýabyn sol kezde tyńdap, máseleni jan-jaqty talqylaımyz», - dedi Senat spıkeri.