Senat jańartylatyn energııa kózderine qatysty zańdy maquldady

<p>ASTANA. KAZINFORM &ndash; Búgin Senattyń jalpy otyrysynda &laquo;Qazaqstan Respýblıkasynyń keıbir zańnamalyq aktilerine jańartylatyn energııa kózderin paıdalanýdy qoldaý jáne elektr energetıkasy máseleleri boıynsha ózgerister men tolyqtyrýlar engizý týraly&raquo; Zańy eki oqylymda qaralyp, maquldandy.</p>

«Zań jańartylatyn energııa kózderi salasyn jetildirýge baǵyttalǵan.

«Qazaqstan Respýblıkasynyń jasyl ekonomıkaǵa kóshý tujyrymdamasyna» sáıkes, elimiz 2030 jylǵa qaraı jalpy elektr energııasyn óndirýdegi jańartylatyn energııa kózderiniń úlesin 10 paıyzǵa jetkizýi tıis jáne 2050 jylǵa qaraı jalpy elektr energııasyn óndirýdegi balamaly ári jańartylatyn energııa kózderiniń 50% úlesine jetýi qajet. Degenmen, ulttyq derekterge sáıkes, 2023 jyldyń qorytyndysy boıynsha Qazaqstanda jańartylatyn energııanyń úlesi óndirilgen elektr energııasynyń tek 6 paıyzyn qurady. Qarastyryp otyrǵan Zańdy qabyldaý osy salaǵa oń áserin tıgizetini sózsiz», - dedi senator Álibek Náýtıev.

Atap aıtqanda, Zań elektr energııasyn satatyn jeke tulǵalardyń netto-tutynýshy retinde jeke kásipker bolyp tirkelý mindetin joıady. Bul norma jańartylatyn energııany paıdalanýshylardyń sanyn arttyrýǵa, sondaı-aq elektr jelilerine júktemeni azaıtýǵa múmkindik beredi.

Senattyń Ekonomıkalyq saıasat, ınnovatsııalyq damý jáne kásipkerlik komıtetiniń málimetinshe, «netto-tutynýshy» uǵymy naqtylanady – jańartylatyn energııa kózderin paıdalanatyn aýqymy shaǵyn obektiden elektr energııasyn jáne jylý energııasyn óziniń tolyq ári ishinara tutynýyn qamtamasyz etetin jeke nemese zańdy tulǵa.

Sonymen birge, energııamen jabdyqtaýshy uıymnyń netto-tutynýshylardan elektr energııasyn satyp alý jónindegi mindettemeleri, energııa berýshi uıymdardyń netto-tutynýshylardy elektr jelilerine qosý jónindegi mindettemeleri zańnamalyq deńgeıde bekitiledi. Netto-tutynýshylardy elektr energııasyn bergeni úshin tólemnen bosatý eskerilgen, sondaı-aq shaǵyn gıdroelektr stantsııalaryna (10 MVt deıin) elektr energııasyn shekti tarıf boıynsha satý quqyǵy beriledi.

«Budan basqa, kommýnaldyq menshiktegi Óńirlik elektr jelileri kompanııasynyń jelilerin bıýdjet qarajaty esebinen kredıtteý, rekonstrýktsııalaý jáne jańǵyrtý múmkindikterin zańnamalyq turǵydan bekitý energetıka salasynyń ınfraqurylymyn jańartýǵa yqpal etedi. Zańnyń normalary jylý elektr stantsııalaryn jańǵyrtý tártibin jetildirýge baǵyttalǵan. Investıtsııalyq tartymdylyqtyń tómendigine baılanysty jylýmen jabdyqtaý sektoryndaǵy qazirgi jaǵdaıdy, tarıfterdi kóterýdiń ótkir áleýmettik mańyzdylyǵyn jáne Respýblıkalyq mańyzy bar qalalardaǵy ekologııalyq ahýaldyń nasharlaýyn eskerip, sondaı-aq ınvestıtsııalyq kelisimder aıasynda jabdyqtardy gazǵa aýystyra otyryp, jylý elektr stantsııalaryn jańǵyrtý múmkindikteri qamtamasyz etiledi», - dedi depýtat.

Zańdy qabyldaýdyń oń áserleriniń qataryna mynalardy atap aıtýǵa bolady:

- kúndelikti ómirde jańartylatyn energııa kózderin belsendi engizý, 

- jańa jumys oryndaryn qurý, 

- jelilik ınfraqurylymdy odan ári damytý,

- eldiń energetıka sektoryna ınvestıtsııalar tartýǵa yqpal etý.