Senat jańa týǵan nárestege birden JSN beretin zań normasyn maquldady

<p>ASTANA. KAZINFORM &ndash; Senat depýtattary keıbir zańnamalyq aktilerge baılanys, tsıfrlandyrý, ınvestıtsııalyq ahýaldy jaqsartý jáne artyq zańnamalyq reglamentteýdi bolǵyzbaý máseleleri boıynsha ózgerister men tolyqtyrýlar engizýdi kózdeıtin zańdy maquldady.</p>

Palata depýtaty Baýyrjan Qanıev atalǵan qujat Qazaqstannyń 38 zańnamalyq aktisine, onyń ishinde 9 kodeks pen 29 zańǵa ózgerister men túzetýler engizetinin aıtty.

Olar:

- baılanys operatorlarynyń baılanys ınfraqurylymyna teń qoljetimdiligin qamtamasyz etý;

- eldi mekenderdiń bas josparlary men egjeı-tegjeıli josparlaý jobalary sheńberinde baılanys jelilerin ornalastyrý oryndaryn aıqyndaý;

- aýyl sharýashylyǵy jáne ónerkásip obektilerinde tsıfrlandyrý kezinde shyǵystardyń bir bóligin óteý boıynsha baılanys qyzmetterin sýbsıdııalaý;

- jańa týǵan nárestelerdiń derbes derekterin joǵaltý táýekelderin boldyrmaý úshin bala týǵannan keıin birden jeke sáıkestendirý nómirlerin berý;

- baılanys operatorlaryn múgedektigi bar adamdarǵa jeńildikti tarıfter berýge mindetteý

- alaıaqtyq belgileri bar tólem tranzaktsııalary boıynsha derekter almasý úshin antıfrod-ortalyqtyń quqyqtyq mártebesi men fýnktsııalaryn bekitý.

«Jer qoınaýyn paıdalanýshylardyń kelisimshart talaptaryn saqtaýyn baqylaýǵa qajet ǵaryshtyq monıtorıng júıesi arqyly orman qoryn qorǵaý, saqtaý, paıdalaný, ormandardy molyqtyrý jáne orman ósirý salasyndaǵy zańnamanyń buzylýy týraly aqparat alý da osy zańnyń aıasynda qarastyrylǵan. Sondaı-aq, oblystyń, respýblıkalyq mańyzy bar qalanyń, astananyń ákimdikterine telekommýnıkatsııa jelileri men kabeldik kárizderdi bıýdjet esebinen túgendeý quzyreti beriledi. Zań maquldanǵan jaǵdaıda baılanys jelileriniń qurylysy jedeldetiledi. Baılanys qyzmetteriniń sapasy jaqsaryp, qamtý aımaqtary keńeıedi jáne abonentter sany artady. Sonymen qatar, baılanys operatorlary arasynda básekelestik damyp, spýtnıktik baılanys jumys isteı bastaıdy. Investıtsııalyq ahýal jaqsaryp, ekonomıkadaǵy ınnovatsııalardyń úlesi artady», - dedi Baýyrjan Qanıev.