Senat ulttyq sport túrlerin damytýǵa qatysty zańdy qabyldady

NUR-SULTAN. QazAqparat – Parlament Senatynyń jalpy otyrysynda «Qazaqstan Respýblıkasynyń keıbir zańnamalyq aktilerine mádenıet, dene shynyqtyrý jáne sport máseleleri boıynsha ózgerister men tolyqtyrýlar engizý týraly» Zańy qabyldandy, dep habarlaıdy QazAqparat tilshisi.

Zań jobasynyń negizgi baǵyttary: ýákiletti organnyń quzyretin keńeıtý, jergilikti atqarýshy organdardyń quzyretin keńeıtý, sporttyq ınfraqurylymynyń qoljetimdiligi, bilim berý salasyndaǵy jańalyqtar.

Mádenıet jáne sport mınıstri Aqtoty Raıymqulovanyń aıtýynsha,

ýákiletti organnyń quzyreti ulttyq sport túrleriniń tizbesin bekitý, balalarǵa arnalǵan sport sektsııalary men shyǵarmashylyq úıirmelerge memlekettik sporttyq jáne shyǵarmashylyq tapsyrysty ornalastyrý qaǵıdalaryn bekitý, sondaı-aq memlekettik sporttyq jáne shyǵarmashylyq tapsyrysty qarjylandyrýdyń jan basyna shaqqandaǵy normatıvin bekitý boıynsha tıisti fýnktsııalarmen tolyqtyryldy.

«Jergilikti atqarýshy organdardyń quzyreti kelesi qyzmettermen tolyqtyryldy: dárigerlik-dene shynyqtyrý dıspanserleriniń sanyn arttyrý, halyqpen jumys isteý úshin dene shynyqtyrý jáne sport nusqaýshylarymen qamtamasyz etý, memlekettik sporttyq ári shyǵarmashylyq tapsyrysty bekitý jáne ornalastyrý, balalar-jasóspirimder dene shynyqtyrý daıarlyǵy klýbtar jelisin keńeıtý», - dedi mınıstr.

Sport ınfraqurylymynyń qoljetimdiligi mynalardy qarastyrady:

- múgedekter men halyqtyń júrip-turýy shekteýli toptaryn qosa alǵanda, olardyń turǵylyqty jeri boıynsha jáne kópshilik demalatyn oryndarda sport obektileriniń qoljetimdiligin qamtamasyz etý;

- turǵyn úı keshenderin salý kezinde múgedekter men halyqtyń júrip-turýy shekteýli toptarynyń qoljetimdiligin eskere otyryp, sport alańdarymen qamtamasyz etý qajettiligi.

Jalpy otyrys barysynda Senat tóraǵasy Máýlen Áshimbaev bul qujat balalardyń jan-jaqty damýyna yqpal etetin sport jáne shyǵarmashylyq baǵyttaǵy memlekettik tapsyrystardy tıimdi uıymdastyrýǵa múmkindik beretinin atap ótti.

«Budan bylaı memleket qarjylandyratyn sporttyq jáne shyǵarmashylyq úıirmeler memlekettik satyp alýdyń qorytyndysyna baılanysty emes, olardyń reıtıngine, sondaı-aq, halyqtyń suranysyna qaraı anyqtalady. Osy zańǵa múmkindigi shekteýli jandar úshin turǵylyqty jerde jáne demalys oryndarynda sportpen shuǵyldanýǵa jaǵdaı jasaý normalary da engizildi. Soǵan sáıkes bul jumys endi jergilikti atqarýshy organdardyń mindeti bolyp esepteledi. Sonymen qatar bul qujatta ulttyq sport túrlerin damytý, olardy jas býynǵa mektep kezinen bastap nasıhattaý máselelerine de erekshe nazar aýdarylǵan», – dedi M. Áshimbaev.