Senat úkimettik emes uıymdardy qoldaý júıesin jetildirýge baǵyttalǵan qujatty Májiliske qaıtardy

TANA. 3 qarasha. QazAqparat /Qanat Mámetqazyuly/ - Búgin QR Parlamenti Senatynyń jalpy otyrysynda «Qazaqstan Respýblıkasynyń keıbir zańnamalyq aktilerine memlekettik áleýmettik tapsyrys máseleleri boıynsha ózgerister men tolyqtyrýlar engizý týraly» zań jobasy talqylandy.

Qujatqa birqatar ózgerister engizilgendikten, zań jobasy Májiliske qaıtaryldy.

Esterińizge sala keteıik, atalǵan zań jobasynyń maqsaty úkimettik emes uıymdardy memlekettik qoldaý júıesin jetildirý bolyp tabylady. Bul rette memlekettik áleýmettik tapsyrysty júzege asyrý úderisinde týyndaıtyn qoǵamdyq qatynastar sýbektilerine bólinetin bıýdjet qarajatyn tıimdi paıdalanýǵa qatysty ıgerý jaýapkershiligin arttyrý kózdeledi.

Zań jobasy memlekettik áleýmettik tapsyrys úderisiniń jarııalylyǵy men ashyqtyǵyna, memlekettik áleýmettik tapsyrys boıynsha qyzmet berýshilerdi sapaly iriktep alýdy qol jetkizýge múmkindik beredi. Budan bólek, qujat memlekettik saıasat basymdyqtaryn jáne memlekettik áleýmettik tapsyrysty bólý kezinde respýblıka men onyń jekelegen óńirleriniń áleýmettik-ekonomıkalyq damý qajettilikterin eskerý jónindegi pármendi tetikterdi qurýǵa baǵyttalady.

Talqylaý barysynda senatorlar Májilis maquldaǵan jobaǵa birqatar túzetýler engizgen bolatyn. Atap aıtqanda, joǵarǵy palata «memlekettik áleýmettik tapsyrysty berýshiler tizilimi» degen jańa uǵym engizip otyr. Buǵan qatysty jańa normalar da tolyqtyryldy.