Senat transshekaralyq ózenderdi halyqaralyq negizde paıdalaný qujatyn bekitti

<p>ASTANA. KAZINFORM &ndash; Búgin Senattyń jalpy otyrysynda &laquo;Halyqaralyq sý aǵyndaryn keme qatynasynan basqasha paıdalaný túrleriniń quqyǵy týraly konventsııany ratıfıkatsııalaý týraly&raquo; Zańy maquldandy.</p>

«Bul Konventsııany Birikken Ulttar Uıymynyń Bas Assambleıasy 1997 jylǵy 21 mamyrda qabyldap, 2014 jylǵy 17 tamyzdan bastap kúshine endi. Qazirgi kezde 37 memleket Konventsııanyń qatysýshysy. Qazaqstanmen kórshiles elderdiń ishinde tek Ózbekstan Respýblıkasy Konventsııanyń múshesi. Qujat transshekaralyq ózender men kólderdi jáne olarmen baılanysty jerasty sýlaryn búkil álemde teń quqyqty ári turaqty basqarýǵa yqpal etetin jahandyq quqyqtyq mehanızm sanalady. Konventsııaǵa qosylý - Qazaqstannyń transshekaralyq ózenderdi halyqaralyq quqyq qaǵıdattary negizinde paıdalaný jáne qorǵaý máselesi boıynsha kórshi eldermen ózara is-qımyldaǵy ustanymyn nyǵaıtady», - dedi senator Janbolat Jórgenbaev.

Onyń aıtýynsha, bul konventsııada halyqaralyq sý aǵyndaryn ádil ári aqylǵa qonymdy paıdalaný qaǵıdattary aıqyndalǵan. Sonymen qatar, qujat transshekaralyq sýdy paıdalanýdyń neǵurlym ótkir memleketaralyq máselelerin sheshý úshin ortaq quqyqtyq alań qurýǵa múmkindik beredi.

«Konventsııaǵa qosylýdyń negizgi faktorlarynyń biri - Ózbekstanmen transshekaralyq ózen basseınderinde gıdrotehnıkalyq qurylystar salý jóninde josparlanǵan is-sharalardy úılestirý, onyń ishinde Qazaqstan Respýblıkasy men Ózbekstan Respýblıkasy arasyndaǵy transshekaralyq sý aıdyndaryn birlesip basqarý men paıdalaný týraly Kelisim jobasynyń normalaryn talqylaý jáne kelisý», - dedi depýtat.

Konventsııa taraptary mynadaı mindettemelerdi qabyldady:

- basqa taraptarǵa aıtarlyqtaı zııan keltirmeý;

- transshekaralyq ózenderdi basqarý boıynsha yntymaqtastyq jasaý;

- sý aǵynynyń jaı-kúıi jáne sýdy paıdalaný boıynsha derekter men aqparatpen almasý.

Atalǵan sharalar transshekaralyq sý aǵyndary boıynsha tıimdi yntymaqtastyqtyń kepili bolady.