Senat Tótenshe jaǵdaı qaterin azaıtý jónindegi ortalyqqa qatysty qujatty maquldady
Osy Kelisim 2022 jylǵy 17 maýsymda Qazaqstan Respýblıkasynyń astanasynda bekitilgen.
«Atalǵan qujat Qazaqstan Respýblıkasynyń Úkimeti men Qyrǵyz Respýblıkasynyń Úkimeti arasyndaǵy 2013 jylǵy 17 mamyrdaǵy Tótenshe jaǵdaılardy jáne apattar qaýpin tómendetý ortalyǵyn qurý týraly kelisimniń 6-babyn iske asyrý úshin jasaldy. Onda Ortalyqtyń bolý sharttary Qazaqstan Respýblıkasynyń Úkimeti men Tótenshe jaǵdaılar jáne dúleı zilzalalardyń qaýip-qaterin azaıtý jónindegi ortalyq arasyndaǵy jeke halyqaralyq shartpen aıqyndalatyny kórsetilgen. Osy oraıda qaralyp otyrǵan Kelisim Tótenshe jaǵdaılar jáne dúleı zilzalalardyń qaýip-qaterin azaıtý jónindegi ortalyqtyń Qazaqstan aýmaǵynda bolýy jáne jumys isteýi máselelerin retteıdi», - dedi senator Gennadıı Shıpovskıh.
Kelisimniń 3-babyna sáıkes, Ortalyqtyń zańdy tulǵa mártebesi bar. 2016 jyldan bastap Ortalyq óńir memleketteriniń tótenshe vedomstvolarymen, halyqaralyq jáne úkimettik emes uıymdarmen birlesip, zilzalalar men tótenshe jaǵdaılardyń qaýpin azaıtý salasynda, onyń ishinde atqarýshy agenttik retinde 30-dan astam baǵdarlama men jobalardy iske asyrdy jáne iske asyrýdy jalǵastyryp keledi. 11 joba Qazaqstan Respýblıkasynyń damýyna tikeleı úles qosady.
«Kelisimge sáıkes Ortalyqtyń múlki men aktıvteri ákimshilik aralasýdyń nemese sottyń aralasýynyń kez kelgen jaǵdaıyna qatysty ımmýnıtetti paıdalanady. Odan basqa, Ortalyqtyń nysandary men kólik quraldary, sondaı-aq onyń arhıvteri men qujattary, sonyń arasynda qyzmettik hat-habarlary qaı jerde turǵanyna qaramastan tintýge, rekvızıtsııalaýǵa, tárkileýge jáne Ortalyqtyń qyzmetine kedergi keltiretin kez kelgen basqa aralasý nysanyna jatpaıdy», - dedi depýtat.
Budan buryn habarlanǵandaı, bıyl 5 sáýirde Parlament Májilisi atalǵan zańdy qabyldady.