Senat tóraǵasynyń orynbasary Shymkent pedagogtaryna jańa zańdy túsindirdi

ShYMKENT. QazAqparat - QR Parlament Senaty torynbasary Bektas Beknazarov, senatorlar Nurlan Beknazarov pen Aıgúl Qapbarova jumys saparymen Shymkent qalasynda júr, dep habarlaıdy QazAqparat qala ákiminiń resmı saıtyna silteme jasap.

Senat Tóraǵasynyń orynbasary sapar barysynda qala ákimi Erlan Aıtahanovpen kezdesti.

Kezdesýde Parlamentpen qabyldanǵan zańdardyń mazmuny, rýhanı jańǵyrý jáne ulttyq qundylyqtardy saqtaý máseleleri jóninde áńgime órbidi.

Sonymen qatar, depýtattar qalanyń 2019 jylǵy áleýmettik-ekonomıkalyq damýyndaǵy negizgi qorytyndylarmen jáne bıylǵy josparmen tanysty.

Qala basshysy ónerkásip pen bilim berý, densaýlyq saqtaý jáne mádenıet salalarynda atqarylǵan jumystar jaıy men megapolısti damytý baǵytyndaǵy josparlarymen bólisti.

«Memleket basshysynyń Shymkent qalasyn damytý boıynsha bergen tapsyrmasynyń negizinde qalanyń úsh jyldyq damý jospary bekitildi. Bizdiń jumysymyzdyń negizgi baǵyty - Túrkistan oblysynan qosylǵan 41 eldi mekenniń ınfraqurylymyn damytý. Máselen, bıylǵy bıýdjettiń 70 paıyzy dál osy 41 eldi mekenniń atalmysh problemalaryna baǵyttalady», - dedi Erlan Qýanyshuly.

Óz kezinde Bektas Ábdihanuly Parlamentpen qabyldanǵan zańdardy halyqqa keńinen túsindirý maqsatynda osy jyldyń 5 qańtarynan bastap óńirlerdi aralap, turǵyndarmen kezdesip júrgenin aıtty.

«Ótken jyly Senat pen Májilis halyqtyń turmys sapasyn jaqsartýǵa jol ashatyn 83 zań jobasyn qabyldady. Qos palata depýtattary zańnamalyq jumysta Tuńǵysh Prezıdent – Elbasynyń áleýmettik strategııalyq bastamalary men Prezıdenttiń halyqty qoldaýǵa arnalǵan tapsyrmalaryn negizge aldy. Eń bastysy qabyldanǵan barlyq qujat azamattardy qoldaýǵa jáne qorǵaýǵa arnaldy», - dep atap ótti Senat spıkeriniń orynbasary.

Osy kúni B.Bekzanarov keıbir zańnamadaǵy ózgerister men «Pedagog mártebesi týraly» QR zańyn keńinen túsindirý maqsatynda qaladaǵy bilim berý salasynyń qyzmetkerlerimen kezdesti.

Jańa zańnyń artyqshylyqtaryna toqtalǵan Senat tóraǵasynyń orynbasary qujatta muǵalimderdiń kásibı qyzmetindegi quqyqtary men mindetteri egjeı-tegjeıli sıpattalǵanyn atap ótti.

Jumys sapary barysynda depýtattar qalanyń áleýmettik-ekonomıkalyq jaǵdaıymen tanysyp, birqatar óndiristik jáne áleýmettik nysandarynda boldy.