Senat tóraǵasy Jastar jylynyń negizgi maqsatyn atady

ASTANA. QazAqparat - Jastar jyly óskeleń urpaqtyń barynsha sapaly ómir súrýine qajetti jaǵdaı jasaýǵa negizdelip otyr. Bul týraly Jastar jylynyń maqsatyna arnalǵan dóńgelek ústelde Parlament Senatynyń tóraǵasy Qasym-Jomart Toqaev málim etti, dep habarlaıdy QazAqparat.

«Prezıdent jarııalaǵan Jastar jylynyń eń basty maqsaty - óskeleń urpaqtyń barynsha sapaly ómir súrýine qajetti jaǵdaı jasaý. Óıtkeni, jastar - bul memleketimizdiń kúsh-qýatyn eseleıtin eń negizgi myqty býyn. Qazaqstan osyndaı aryndy urpaqtan kende emes jas memleket. Árbir ekinshi qazaqstandyqtyń jasy 30-dan tómen bolsa, azamattarymyzdyń ortasha jasy 34-ten aspaıdy. Memleket basshysy jýyrda Jastarmen ótkizgen kezdesýinde atap kórsetkendeı, aǵa býyn ókilderi Keńes odaǵy ydyraǵannan keıingi asa kúrdeli geosaıası ahýalda jańa memlekettiń irgetasyn qalady, memleketimizdi órkenıetti elderdiń qataryna qosty, kórshiles eldermen tıisti sharttarǵa qol qoıyp, shekaranyń myzǵymastyǵyn qamtamasyz etti jáne Qazaqstan ekonomıkasynyń odan ári qarqyndy damýy úshin qajetti jaǵdaı jasady», - dep toqtaldy Senat tóraǵasy.

Osy oraıda ol Elbasynyń aıryqsha kúsh-jigeriniń arqasynda búginde elimiz barsha álemge tanymal, yqpaldy jáne bedeldi memleketke aınalǵanyn atap ótti.

«Qazir qazaq halqyn búkil álem qaýymdastyǵy qurmetteıdi jáne onyń pikirimen sanasady. Bul - el tarıhynda buryn-sońdy bolmaǵan, ata-babamyz armandaǵan eń úlken jetistik. Sondyqtan Prezıdent aıtyp ótkendeı, elimizdiń erteńi jas urpaqtyń qolyndaǵy asyl amanat», - dedi Qasym-Jomart Toqaev.

Budan buryn habarlanǵandaı, Senat tóraǵasy Mekteptegi zorlyq-zombylyqqa kóz jumyp qaraýǵa bolmaıtynyn atap ótti.