Senat Tóraǵasy Ult josparyna áriptesteriniń nazaryn aýdardy

ASTANA. QazAqparat - 25 mamyrda Qasym-Jomart Toqaev Parlament Senaty Bıýrosynyń otyrysyn ótkizdi. Memleket basshysy N.Nazarbaevtyń bes ınstıtýtsıonaldyq reformany iske asyrý jónindegi 100 qadam - Ult josparyna Bıýro músheleriniń nazaryn aýdarǵan Q.Toqaev álemdik qoǵamdastyqta moıyndalǵan kórnekti reformator Elbasy baǵdarlamasynyń ereksheligin atap ótti.

Senat basshysy áriptesterine Ult josparyn zerdeleýdi jáne qazirgi kezdegi zań shyǵarý isinde paıdalanýdy tapsyrdy. «Ult josparyn iske asyrý bizdiń elimizdi damýdyń jańa sapasyna shyǵarady jáne álemniń eń damyǵan otyz eliniń qataryna enýge múmkindik beredi. Biz osy baǵdarlamanyń iske asyrýǵa óz úlesimizdi qosyýymyz kerek», - dedi Senat Tóraǵasy.

Joǵarǵy Palatanyń 28 mamyrda bolatyn kezekti otyrysynda senatorlar «Qazaqstan Respýblıkasy men Qyrǵyz Respýblıkasy arasyndaǵy Shekara aýdanyndaǵy senim sharalary jónindegi kelisimdi ratıfıkatsııalaý týraly»; «Qazaqstan Respýblıkasynyń Úkimeti men Qyrǵyz Respýblıkasynyń Úkimeti arasyndaǵy Shekara ókilderiniń qyzmeti týraly kelisimdi ratıfıkatsııalaý týraly»; «Qazaqstan Respýblıkasynyń bitimgershilik qyzmeti týraly»; «Qazaqstan Respýblıkasynyń keıbir zańnamalyq aktilerine Qazaqstan Respýblıkasynyń bitimgershilik qyzmeti máseleleri boıynsha tolyqtyrýlar engizý týraly» (birinshi oqylym) jáne «Qazaqstan Respýblıkasynyń keıbir zańnamalyq aktilerine sýmen jabdyqtaý jáne sý burý, turǵyn úı-kommýnaldyq sharýashylyqty kredıtteý jáne sýbsıdııalaý máseleleri boıynsha ózgerister men tolyqtyrýlar engizý týraly» (ekinshi oqylym) zań jobalaryn qaraıtyn boldy.