Senat Tóraǵasy TMD-daǵy áriptesterimen sý máselesin talqylady
Ózbekstan Olıı Majlısi Senatynyń Tóraǵasy Tanzıla Narbaevamen jaqynda qurylǵan eki eldiń Senattary arasyndaǵy Yntymaqtastyq jónindegi komıssııanyń baılanystary boıynsha ózara parlamentaralyq is-qımyl máseleleri talqylandy.
Máýlen Áshimbaev kelesi jyldyń birinshi jartysynda Qazaqstanda Aral óńirinde komıssııa otyrysyn ótkizýdi usyndy. Onyń aıtýynsha, Komıssııa kún tártibindegi negizgi máselelerdiń biri Qazaqstan men Ózbekstannyń Aral teńizin qalpyna keltirý jónindegi ózara is-qımylyn talqylaý bola alady.
«Jalpy, sý máselesi bizdiń ekijaqty qatynastarymyzda erekshe oryn alady. Aral teńiziniń problemasyn qatar elderimizdiń sý-energetıkalyq áleýetin utymdy paıdalaný jáne transshekaralyq ózenderdiń ekologııasyn qorǵaý máseleleri boıynsha dıalogty odan ári jalǵastyrý mańyzdy. Qazaqstan Prezıdenti atap ótkendeı, «sý dıplomatııasy» aıasyndaǵy kelissózderdiń tezirek aıaqtalýy bizdiń elderimizdiń jáne Ortalyq Azııa memleketteriniń ortaq múddelerine saı keledi» , – dedi Máýlen Áshimbaev.
Máýlen Áshimbaev reseılik áriptesi – Valentına Matvıenkomen kezdesýde de transshekaralyq ózender máselesin qozǵady. Senat Spıkeri Qazaqstan Parlamenti Senaty men Reseı Federaldyq Jınalysy Federatsııa Keńesi arasyndaǵy yntymaqtastyq jónindegi komıssııanyń aldaǵy otyrysynyń kún tártibine sý resýrstaryn birlesip paıdalaný máselesin qosýdy usyndy.
«Sý máselesi bizdiń óńirimiz úshin ózekti túıtkil. Tipti transshekaralyq sý resýrstaryn utymdy jáne uqypty paıdalaný óńirlik damýdyń mańyzdy faktory bolyp sanalady. Odan bólek, pandemııadan keıingi jaǵdaıda turaqty damý máselesi de eki eldiń parlamentshileri úshin mańyzdy ekeni sózsiz» , – dedi Máýlen Áshimbaev.
Ol sondaı-aq Senatta aýyldyq aýmaqtardy keshendi damytý, onyń ishinde ınfraqurylymdy, áleýmettik nysandardy, bıznesti órkendetý, jumys oryndaryn qurý máselelerine basa mán beriletinin eske saldy. Sondyqtan Senat Tóraǵasy osy baǵytty zańnamalyq qamtamasyz etý boıynsha reseılik áriptesterimen tájirıbe almasýdy usyndy.