Senat tóraǵasy shetelden aktıvterdi qaıtarý jónindegi zań qandaı múmkindik beretinin aıtty

ASTANA. QazAqparat – QR Parlamenti Senatynyń tóraǵasy Máýlen Áshimbaev shetelge zańsyz shyǵarylǵan aktıvterdi qaıtarý jaıynda pikir bildirdi, dep habarlaıdy QazAqparat tilshisi.

«Shetelden aktıvterdi elge qaıtarý baǵytynda aýqymdy jumystar bar. Bul óz kezeginde óte kúrdeli jumys. Sonymen qatar, shetelge zańsyz shyǵarylǵan aktıvterdi qaıtarý týraly zań jobasy daıyndaldy. Osy qujat aıasynda aktıvterdi qaıtarý baǵytynda tıisti normalar qamtylady», - dedi M. Áshimbaev Senattyń jalpy otyrysynan keıin tilshiler suraǵyna jaýap bere otyryp.

Bul turǵyda ol tıisti esepshot bar ekenin, oǵan jemqorlardan tárkilegengen jáne qaıtarylǵan qarajat túsetinin aıtty.

«Tıisti qarajat jınaqtalyp jatyr. Qarajat elimizdegi mektep qurylysyna da baǵyttalady, ıaǵnı onda qomaqty soma bar. Atap aıtqanda, osy baǵyttaǵy aýqymdy jumystardyń naqty nátıjesi bar. Meniń oıymsha, Parlament tıisti zańdy qabyldaǵannan keıin, bul saladaǵy qadamdar jańa qarqyn alady. Atalǵan zań birqatar suraqqa jaýap beredi», - dedi Máýlen Áshimbaev.

Budan buryn habarlanǵandaı, QR Parlamenti Senatynyń tóraǵasy Máýlen Áshimbaev Qytaımen aradaǵy vızasyz rejımge qatysty pikir bildirdi.