Senat Tóraǵasy men TúrkPA Bas hatshysy kezdesýinde Túrki Keńesi sammıtiniń sheshimderin iske asyrý talqylandy

NUR-SULTAN. QazAqparat - Senat Tóraǵasy Máýlen Áshimbaev Túrkitildes memleketter Parlamenttik Assambleıasynyń Bas hatshysy Altynbek Mamaıýsýpovpen kezdesti, dep habarlaıdy QazAqparat joǵary palatanyń baspasóz qyzmetine silteme jasap.

Kezdesý barysynda Túrki Keńesiniń tótenshe sammıtiniń sheshimderin iske asyrý máseleleri talqylandy. Atalǵan jıynda memleket basshylary koronavırýs pandemııasymen kúresý úshin ulttyq deńgeıde qabyldanǵan sharalar týraly jáne elderimiz arasyndaǵy indetpen kúres jónindegi yntymaqtastyq boıynsha pikir almasqan bolatyn.

Senat Tóraǵasy TúrkPA-nyń qazaq, ázerbaıjan, qyrǵyz jáne túrik tilderindegi termınologııalyq biryńǵaı zań anyqtamalyǵyn qurý ıdeıasyna qoldaý bildirdi. Bul joba uıymǵa qatysýshy elderdiń zańnamasynda qoldanylatyn quqyqtyq termınologııamen jumysty aıtarlyqtaı jeńildete alady.

Máýlen Áshimbaev byltyr Jastar jyly aıasynda Qazaqstan astanasynda jas parlamentshilerdiń alǵashqy otyrysy ótkenine nazar aýdaryp, bul bastamanyń bolashaqta jalǵasatynyna senim bildirdi.

Sonymen qatar taraptar TúrkPA elderi parlamentshileriniń kópjaqty yntymaqtastyǵyn odan ári damytýǵa qatysty pikir almasyp, uıym qyzmetiniń birqatar ózekti máselelerin talqylady.