Senat tóraǵasy qýańshylyq máselesine alańdaýshylyq bildirdi
Senat baspasóz qyzmetiniń habarlaýynsha, Almaty oblysyna jumys sapary barysynda sharýalarmen kezdesken Senat spıkeri qazirgi tańda elimizdiń keıbir aımaqtarynda qurǵaqshylyq beleń alǵanyn, soǵan baılanysty jergilikti sharýashylyqtar aıtarlyqtaı zardap shegip otyrǵanyn aıtty.
Ol bul problemaǵa Memleket basshysy da nazar aýdaryp, ony jedel sheshý úshin tıisti organdarǵa naqty tapsyrmalar bergenin tilge tıek etti.
«Memleket basshysy Reformalar jónindegi joǵary keńestiń sońǵy otyrysynda mal sharýashylyǵyna aıtarlyqtaı saldaryn tıgizip otyrǵan qýańshylyq máselesine nazar aýdardy. Qazirgi tańda bul – búkil eldi alańdatyp otyrǵan problema. Sondyqtan tıisti Mınıstrlik osy máseleni sheshý úshin bar kúsh-jigerin jumsaýy kerek. Bul jolda júıeli qadamdar qajet. Aýyl sharýashylyǵy mınıstrligi jedel túrde ahýaldyń saldaryn taldap, jaǵdaıdy jan-jaqty saraptap, máseleni sheshý joldaryn usynýǵa tıis», – dedi Máýlen Áshimbaev.
Sonymen qatar palata tóraǵasy senatorlar aýyldyq jerlerdiń ınfraqurylymyn damytý, veterınarııa jáne azyq-túlik qaýipsizdigi máselelerin de jıi kóterip kele jatqanyn atap ótti.
Ol byltyrǵy bıýdjettiń oryndalýy týraly Úkimettiń esebin qaraý kezinde Senat depýtattary agrarlyq salany qarjylandyrýdaǵy olqylyqtarǵa nazar aýdarǵanyn aıtty.
«Aýyl sharýashylyǵyndaǵy negizgi máselelerdiń biri salanyń tolyq qarjylandyrylmaýy bolyp otyr. Mysaly, 2020 jyly agrarlyq sektorǵa josparlanǵan qarajattyń jartysynan astamy ǵana bólingen», – dedi Senat Tóraǵasy.
Sondaı-aq, Almaty oblysynyń sharýalarymen kezdesýde qýańshylyq máselesin sheshýde júıeli jumys júrgizý qajettigi, mundaı tótenshe jaǵdaıǵa daıyndyq árdaıym basty nazarda bolý kerektigi aıtyldy.