Senat tóraǵasy depýtattarǵa Prezıdent tapsyrmalarynyń oryndalýyna monıtorıng júrgizýdi tapsyrdy

NUR-SULTAN. QazAqparat – Senatorlar daǵdarysqa qarsy sharalarǵa bólingen qarajattyń tıimdi jumsalýyn baqylaý kerek. Bul týraly Parlament Senatynyń tóraǵasy Darıǵa Nazarbaeva málim etti, dep habarlaıdy QazAqparat tilshisi.

«Naqtylanǵan bıýdjettiń jańa parametrleri Prezıdenttiń Jarlyǵymen bekitilip, jarııalandy. Jalpy, azamattar men bıznesti qoldaýǵa baǵyttalǵan qarajattyń kólemi 6 trıllıonǵa jýyq teńgeni quraıdy. Bul qarjy daǵdarysqa qarsy sharalardy iske asyrýǵa baǵyttalǵan, ekonomıkany, shaǵyn jáne orta bıznesti, aýyl sharýashylyǵy men azamattardy osy kúrdeli jaǵdaıda qoldaýdy kózdeıdi. Bizdiń mindetimiz – daǵdarysqa qarsy sharalarǵa bólingen qarajattyń jumsalýyn baqylaý jasaý, osy sharalar týraly halyqty habardar etý», -dedi D. Nazarbaeva Senattyń jalpy otyrysynda.

«Sondyqtan Senat komıtetterine óz baǵyttary boıynsha, óńirlerden saılanǵan depýtattarǵa – óz óńirleri boıynsha, Prezıdent tapsyrmalarynyń oryndalýyna turaqty monıtorıng júrgizýdi, Úkimettiń daǵdarysqa qarsy sharalarynyń iske asyrylýyn baqylaýǵa alýdy tapsyramyn», - dedi Senat tóraǵasy.

Budan buryn habarlanǵandaı, jalpy otyrys barysynda Darıǵa Nazarbaeva Agroónerkásip keshenin damytý baǵdarlamasyn qaıta qaraý kerektigin aıtty.