Senat Tóraǵasy: Bizdiń basty maqsatymyz - Memleket basshysy Joldaýyn zańnamalyq turǵyda qamtamasyz etý
Senat Tóraǵasy Prezıdent N.Nazarbaevtyń Qazaqstan halqyna Joldaýyn iske asyrýǵa baılanysty mindetterge Bıýro músheleri men Palata Apparaty qyzmetkerleriniń nazaryn aýdardy. «Joldaýda alǵa qoıylǵan kúrdeli jáne mańyzdy mindetterdi qysqa merzim ishinde, al keıbir máselelerdi shuǵyl túrde oryndaý qajet bolady. Sondyqtan, bizdiń aldaǵy basty maqsatymyz - Elbasynyń strategııalyq mańyzy bar «Nurly jol» qujatyndaǵy tapsyrmalardy zańnamalyq turǵydan qamtamasyz etý», - dep atap ótti Q.Toqaev.
Bıýroda Parlament Májilisinde maquldanǵan zań jobalary Senattyń turaqty komıtetteri men Apparatyna berildi.
Qazaqstan azamattarynyń Belarýs aýmaǵynda jáne Belarýs azamattarynyń Qazaqstan aýmaǵynda bolý tártibi týraly Qazaqstan men Belarýs arasyndaǵy kelisimdi ratıfıkatsııalaý týraly zań jobasy odan ári pysyqtaý úshin Konstıtýtsııalyq zańnama, sot júıesi jáne quqyq qorǵaý organdary komıtetine berildi.
«Qazaqstan Respýblıkasy men Halyqaralyq Qaıta Qurý jáne damý banki arasyndaǵy qaryz týraly kelisimdi (Irrıgatsııalyq jáne drenajdyq júıelerdi jetildirý jónindegi jobanyń ekinshi fazasy) ratıfıkatsııalaý týraly» boıynsha Agrarlyq máseleler, tabıǵatty paıdalaný jáne aýyldyq aýmaqtardy damytý komıteti bas komıtet bolyp belgilendi.
Bıýroda 2014 jylǵy 20 qarashada bolatyn Senattyń kezekti otyrysynyń kún tártibi talqylandy. Otyrysta: «Qazaqstan Respýblıkasy men Italııa Respýblıkasy arasyndaǵy sottalǵan adamdardy berý týraly shartty ratıfıkatsııalaý týraly»; «Qazaqstan Respýblıkasynyń Úkimeti men Qytaı Halyq Respýblıkasynyń Úkimeti arasyndaǵy dıplomatııalyq ókildikterdiń ǵımarattaryn salý úshin jer ýchaskelerin ózara berý týraly kelisimdi ratıfıkatsııalaý týraly»; «Damýǵa resmı kómek týraly»; «Qazaqstan Respýblıkasynyń keıbir zańnamalyq aktilerine damýǵa resmı kómek máseleleri boıynsha ózgerister men tolyqtyrýlar engizý týraly» «Qazaqstan Respýblıkasynyń keıbir zańnamalyq aktilerine salyq salý máseleleri boıynsha ózgerister men tolyqtyrýlar engizý týraly» (birinshi oqylym) zań jobalaryn qaraý kózdelip otyr. Sondaı-aq halyqaralyq parlamenttik uıymdar men Senattyń shet memleketter parlamentterimen yntymaqtastyq toptaryna Palata depýtattaryn jiberý týraly másele de talqylanatyn bolady.