Senat tóraǵasy aýyldardaǵy aýyzsý máselesine alańdaýshylyq bildirdi

ASTANA. QazAqparat – QR Parlamenti Senatynyń tóraǵasy Máýlen Áshimbaev «Tıimdi óńirlik saıasat – elimizdiń ornyqty áleýmettik-ekonomıkalyq damýynyń negizi» taqyrybyndaǵy Parlamenttik tyńdaýda aýyldardaǵy aýyzsý máselesine alańdaýshylyq bildirdi, dep habarlaıdy QazAqparat tilshisi.

«Óńirlerdiń damýyn tejeıtin basty faktorlardyń biri joldardyń jaǵdaıy bolyp qalyp otyr. Senatorlar depýtattyq saýaldarynda bul taqyrypty únemi kóterip keledi. Qazirgi tańda respýblıkalyq mańyzdaǵy joldardyń jartysy ǵana «jaqsy» jaǵdaıda. Jergilikti mańyzdaǵy joldardyń aıtarlyqtaı bóligi «qanaǵattandyrmaıtyn» jaǵdaıda. Birqatar memlekettik baǵdarlamalardyń qabyldanǵanyna qaramastan, halyqty aýyzsýmen qamtamasyz etý máselesi áli kúnge deıin sheshilmegen», - dedi ol.

Onyń aıtýynsha, bul problema ásirese aýyldarda ózekti tur.

«Prezıdenttiń saılaýaldy baǵdarlamasynda eldi mekenderdi sýmen jabdyqtaý júıesimen 100 paıyz qamtý qajettigi aıtylǵan. Bul – aldaǵy kezeńde birlesip atqaratyn ortaq mindetimiz», - dedi Máýlen Áshimbaev.