Senat tóraǵasy áskerı bólimshelerdiń kezekshiligin birneshe aıǵa qaldyrýdy usyndy
«Memleket qazirgi qıyn kezeńde aýqymdy jumystar atqardy. Barshamyzǵa belgili shyǵyndarǵa qaramastan, óte kóp adamǵa naqty kómek kórsetildi. Biz Úkimettiń, Tótenshe jaǵdaı rejımin qamtamasyz etý jónindegi memlekettik komıssııanyń, jergilikti jerlerdegi atqarýshy organdardyń qabyldap jatqan sharalaryn qoldaımyz. Sonymen qatar, túrli sebepterge baılanysty nazardan tys qalýy múmkin, biraq mańyzdy birqatar problemalarǵa nazar aýdarý qajet dep esepteımiz», - dedi D. Nazarbaeva Senattyń jalpy otyrysynda.
Osy oraıda ol depýtattar nazaryn qarttar men balalar úıleri, ınternattar máselesine aýdardy.
«Depýtattarǵa, jeke maǵan da azamattar men osy medıtsınalyq-áleýmettik mekemelerdiń ókilderinen qorǵaný jáne sanıtarııalyq gıgıena quraldarynyń tapshylyǵy týraly ótinishter únemi kelip túsýde. Halyqaralyq jáne otandyq tájirıbe kórsetkendeı, olar – qoǵamnyń eń osal bóligi. Ol adamdar múldem umyt qalǵandaı áserde qalasyń. Bul másele sheshimin tabý qajet», - dedi Senat tóraǵasy.
Sonymen qatar ol jalpy krımınogendik ahýalǵa toqtaldy.
«Bul - qoǵamdy, ásirese iri qalalardyń turǵyndaryn qatty mazalap otyrǵan másele. Qazirden bastap karantın men tótenshe jaǵdaıdan keıin qalalarda krımınogendik ahýaldy turaqtandyrý boıynsha jospar ázirleý qajet dep esepteımin. Áskerı bólimsheler men Ulttyq ulan qurylymdarynyń kezekshiligin birneshe aıǵa qaldyrý, tipti kúsheıtý qajet bolýy múmkin. Qala turǵyndary bul sharaǵa túsinistikpen qarap, qoldaıdy dep senemin. Sonymen qatar, urlyq pen buzaqylyq jasaǵan qylmyskerlerge barynsha qatań jaza qoldana otyryp, ashyi sottar ótkizý kerek», - dedi D. Nazarbaeva.
Munymen qosa ol turmystyq zorlyq-zombylyq jaǵdaıyna pikir bildirdi.
«Qazirgi jaǵdaıda kúsheıe túsken taǵy bir problema. Áıelder men quqyq qorǵaý uıymdarynyń ókilderinen karantın kezinde úıdegi turmystyq zorlyq-zombylyqtyń kúrt óskeni týraly aqparat kelip jatyr. Ókinishke qaraı, bul karantın sharalarynyń tikeleı saldary, zorlyq-zombylyq qurbany bolǵan áıel adam men bala úıinen shyǵyp, qashyp kete almaıdy, kómekke de shaqyra almaıdy. Jergilikti bılik pen quqyq qorǵaý organdaryna osyndaı qylmystardy anyqtaýǵa erekshe nazar aýdarý jáne jalpy áıelderdi qoldaý sharalaryn kúsheıtý qajet dep esepteımin. Áriptesterim bul problemaǵa túsinistikpen qaraıdy dep senemin», - dedi Senat tóraǵasy.