Senat Tóraǵasy áleýmettik sheberhanaǵa jáne áleýmettik qyzmet kórsetý ortalyǵyna bardy
«GreenTAL» áleýmettik jobasynyń negizgi maqsaty – áleýmettik osal toptaǵy azamattardy (múgedektigi bar adamdar, balalar úıiniń túlekteri, jalǵyz basty analar) oqytý jáne jumysqa ornalastyrý. Sheberhanada aǵash jáne tigin tsehtary, polıgrafııa jáne bezendirý stýdııasy jumys isteıdi.
Kásiporyn jumysshylaryn merekemen quttyqtaǵan Senat spıkeri sońǵy jyldarda memleket tarapynan múgedektigi bar adamdardy jáne basqa da áleýmettik osal toptaǵy azamattardy qoldaý baǵytynda aýqymdy jumys atqarylyp jatqanyn aıtty.
«Memleket basshysy múgedektigi bar adamdarǵa júıeli túrde qoldaý kórsetý isine únemi basa mán berip keledi. Bul sala – Senat jumysynyń da basym baǵyttarynyń biri. Prezıdentimizdiń tapsyrmasy boıynsha senatorlar áleýmettik kásipkerlik týraly zań ázirlep, qabyldady. Onda osy salany qoldaýdyń naqty sharalary men túrli jeńildikter kórsetilgen. Qazir bul zańnyń is júzindegi tıimdiligin arttyrý mańyzdy. Qajet bolǵan jaǵdaıda senatorlar áleýmettik osal toptaǵy azamattardy qoldaýdyń jańa sharalaryn usyný jáne ári qaraı iske asyrý úshin áleýmettik kásipkerlermen birlesip jumys isteýge daıyn», – dedi Máýlen Áshimbaev.
Sondaı-aq Senat Tóraǵasy Memleket basshysynyń jańa Joldaýynda aıtylǵan saıası reformalarǵa toqtalyp ótti. Ol jańa bastamalardy iske asyrý múgedektigi bar adamdardyń da saıası jáne azamattyq belsendiligin arttyrýǵa tyń serpin beretinine senim bildirdi.
Sonymen qatar búgin Palata spıkeri elorda ákimi Altaı Kólginovpen birge «Sharapat» áleýmettik qyzmet kórsetý ortalyǵyna bardy. Bul jerde egde jastaǵy jáne múgedektigi bar adamdarǵa sapaly kútim jasaý boıynsha tolyq keshendi qyzmet kórsetiledi.
Naýryz meıramyna oraı Ortalyq turǵyndaryna arnalǵan merekelik kontsert uıymdastyryldy. Іs-sharany ashqan M. Áshimbaev sol jerdegi soǵys jáne eńbek ardagerlerine elimizdiń memlekettiligin qalyptastyrýǵa qosqan úlesteri úshin alǵys bildirdi.
«Aǵa býynnyń erik-jigeri men qajyrly eńbeginiń arqasynda biz Táýelsizdigimizdi nyǵaıtyp, egemen el qura bildik. Bizdiń ardagerlerimiz ulttyq qundylyqtardy dáripteýge jáne qazaqstandyqtardyń jańa býynyn tárbıeleýge úlgen úles qosyp keledi. Sol úshin sizderge alǵysymyzdy bildiremiz. Qarııalarymyzǵa qamqorlyq tanytyp, barlyq jaǵdaıdy jasaý – bizdiń perzenttik jáne azamattyq borshymyz. Memleket bul baǵyt boıynsha ári qaraı belsendi jumys istep, áleýmettik qoldaý sharalaryn arttyra beredi», – dedi Senat Tóraǵasy.