Senat Tóraǵasynyń orynbasary Azııa áıelderiniń forýmyna qatysty
Іs-sharaǵa qatysýshylar Beıjiń is-qımyl tuǵyrnamasyn iske asyrý, sondaı-aq áıelderdiń qazirgi jahandyq ekonomıka jaǵdaıyndaǵy ekonomıkalyq quqyqtary men múmkindikterin keńeıtý máselelerin talqylady.
Senat Tóraǵasynyń orynbasary Olga Perepechına forýmda sóılegen sózinde Prezıdent Qasym-Jomart Toqaev júrgizip otyrǵan memlekettik saıasattaǵy negizgi basymdyqtardyń biri – genderlik teńdik, áıelderdiń qoǵamdyq-saıası jáne ekonomıkalyq ómirge qatysý deńgeıin arttyrý ekenin atap ótti.
«Áıelderdiń ekonomıkalyq múmkindikterin keńeıtý kez kelgen memlekettiń damýyndaǵy negizgi másele jáne ornyqty bolashaq qalyptastyrýdyń kilti sanalady. Turaqty ekonomıkalyq ósýdi jedeldetý jáne qoǵamdyq ál-aýqatty barlyq deńgeıde jaqsartý úshin áıelderdiń ekonomıkalyq mártebesin kóterý asa mańyzdy. Sondyqtan Qazaqstan áıelder kásipkerligin qoldaýdy kúsheıtýde belsendi jumys júrgizip keledi. Qazaqstandaǵy jumys istep turǵan shaǵyn jáne orta bıznes sýbektileriniń 47%-yn áıelder basqarady. Olardyń áleýetin sapaly turǵyda kúsheıtý úshin Azııa Damý Bankimen jáne BUU Damý baǵdarlamasymen yntymaqtasa otyryp elimizdiń barlyq óńirinde áıelder kásipkerligin damytý ortalyqtary iske qosyldy», - dedi Olga Perepechına.
Senat Tóraǵasynyń orynbasary sonymen qatar Pekın tuǵyrnamasy úkimetterdiń, halyqaralyq uıymdardyń jáne azamattyq qoǵamnyń kúsh-jigerin jumyldyrý arqyly jynystyq kemsitýdiń barlyq túrin joıýǵa baǵyttalǵan qýatty tetikke aınalǵanyn atap ótti. Kúsh-jigerdi biriktirý men elder arasyndaǵy áreketterdi úılestirý genderlik teńdik baǵdarlamasyn odan ári ilgeriletýge eleýli túrde jáne uzaq merzimge oń yqpal ete alady.
Olga Perepechına sonymen qatar Ózbekstan Olıı Májilisi Senatynyń Tóraǵasy Tanzıla Narbaevamen kezdesti. Taraptar parlamentaralyq yntymaqtastyqty damytý, ónerkásip kooperatsııasy, kólik baılanysy salasyndaǵy baılanystardy nyǵaıtý, ınfraqurylymdyq jáne saýda kedergilerin joıý máselelerin talqylady.
Ol sondaı-aq Qatar Shýra Keńesi Tóraǵasynyń orynbasary Hamda bınt Hasan Al Sýlaıtımen kezdesti. Kezdesýge qatysýshylar eki eldiń parlamentteri arasyndaǵy ózara is-qımyldyń keleshegin, áıelder men balalarǵa qatysty zorlyq-zombylyqtyń barlyq túrin joıýdaǵy óńirlik máselelerdi talqylady.