Senat tóraǵasy OzgeEpic kreatıv habynyń jumysymen tanysty
Hab qyzmetiniń negizgi baǵyty – ulttyq qundylyqtardy dáripteý jáne óner salasyndaǵy talanttardyń qoldaý.
Óz sózinde Máýlen Áshimbaev qazirgideı tehnologııa zamanynda kreatıvti ındýstrııanyń ekonomıkalyq múmkindigi men keleshegi zor ekenin atap ótti. Sondyqtan Memleket basshysy Qasym-Jomart Toqaevtyń tapsyrmasymen Qazaqstanda osy salany damytý baǵytynda aýqymdy sharalar iske asyrylyp jatyr.
«Prezıdentimiz Qasym-Jomart Kemeluly Toqaev óziniń Joldaýynda kreatıvti ındýstrııany jáne zamanaýı tehnologııany damytý jóninde naqty mindetter júktedi. Sondaı-aq Memleket basshysy iri qalalarmen birge aýdandarda da shyǵarmashyl jastardy qoldaýǵa arnalǵan ortalyqtar ashý qajet ekenin aıtty. Sonyń aıasynda osyndaı habtardyń mańyzy zor. Bul jerde biz kreatıvti alańdardyń jaı-kúıimen, jumysymen jáne aldaǵy josparlarymen tanysa alamyz. Ózderińizge belgili, taıaýda kreatıvti sektor úshin salyqtyq jeńildikter qarastyryldy. Osyndaı naqty sharalar elimizde bul salany damytýǵa tyń serpin beredi dep senemiz», – dedi Máýlen Áshimbaev.
Sonymen qatar Senat Tóraǵasy kreatıvti ındýstrııanyń jaǵdaıy adamı kapıtaldyń sapasyn kórsetetin negizgi faktorlardyń biri ekenin aıtty. Qazirgi tańda kreatıvti sektordyń el ekonomıkasyndaǵy úlesi 1 paıyzdan aspaıdy. Osy kórsetkishti jaqsartý úshin aldaǵy ýaqytta atalǵan ındýstrııany damytý jolynda jan-jaqty, onyń ishinde, zańnamalyq baǵytta da birlesken ári júıeli jumys qajet.
«Bul baǵytty tıimdi damytý úshin salalyq zańnamany jetildirý de asa mańyzdy. Osyǵan oraı depýtattar tıisti jumystardy atqaryp jatyr. Sondaı-aq qazir kreatıvti ındýstrııa bilim berý úderisiniń de ajyramas bólshegine aınalǵanyn kórip otyrmyz», – dedi Senat Tóraǵasy.
Іs-sharaǵa Mádenıet jáne aqparat mınıstrliginiń ókilderi, kınorejısserlar, prodıýserler, teatr akterleri, sýretshiler jáne basqa da óner qaıratkerleri qatysty.