Senat Tóraǵasy Musylman aqsaqaldar keńesiniń Bas hatshysymen kezdesti
Suhbat barysynda taraptar jahandyq dinaralyq jáne órkenıetaralyq dıalogty odan ári ilgeriletý baǵytyndaǵy ózara is-qımyldyń keleshegin talqylady.
Senat Spıkeri Musylman aqsaqaldar keńesiniń Bas hatshysyna iltıpat bildirip, Uıym jumys istep kele jatqan 10 jyldyń ishinde halyqaralyq arenada beıbitshilik, birlik jáne dinı toleranttylyq ıdeıalaryn dáripteýge úlken úles qosqanyn atap ótti.
Kezdesý kezinde Keńestiń maqsattary Álemdik jáne dástúrli dinder lıderleri seziniń qaǵıdalarymen úndesetini aıtyldy. Máýlen Áshimbaev Musylman aqsaqaldar keńesiniń Ortalyq Azııadaǵy ókildiginiń Astanada ashylýy sonyń jarqyn kórinisi sanalatynyn tilge tıek etip, bul oqıǵa Qazaqstan úshin erekshe mańyzǵa ıe ekenine nazar aýdardy.
Sonymen qatar Álemdik jáne dástúrli dinder lıderleri sezi Hatshylyǵynyń Tóraǵasy Máýlen Áshimbaev Sezdi damytý Tujyrymdamasyna sáıkes aldaǵy ýaqytta Hatshylyq tarapynan atqarylatyn jumystarǵa toqtaldy. Ol Musylman aqsaqaldar keńesimen baılanysty odan ári nyǵaıtýǵa, sondaı-aq, daý-janjaldardy beıbit jolmen sheshý jáne ózekti syn-qaterlerdi eńserý úshin rýhanı dıplomatııanyń áleýetin damytýǵa múddeli ekenin jetkizdi.
«Qazaqstan Prezıdenti Qasym-Jomart Kemeluly Toqaev halyqaralyq qaýipsizdiktiń jańa júıesin qurý úshin beıbitshilikke shaqyratyn tyń jahandyq qozǵalys qajet ekenin únemi aıtyp keledi. Qazirgi tańda Musylman aqsaqaldar keńesi barlyq dinderdiń dıalogyn nyǵaıtý jolyndaǵy jumysty belsendi júrgizip otyr. Biz Keńes pen Álemdik jáne dástúrli dinder lıderleri seziniń jahandyq ózekti máselelerdi sheshý isinde din lıderleriniń áleýetin paıdalaný jónindegi yntymaqtastyǵyn quptaımyz. Birlesken kúsh-jigerdiń arqasynda konfessııaaralyq jáne órkenıetaralyq dıalogty nyǵaıtýǵa yqpal etemiz dep senemiz», – dedi Senat Tóraǵasy.
Óz kezeginde Muhammed Ábdelsalam Qazaqstannyń tózimdilik pen kelisim sııaqty qundylyqtardy dáripteý baǵytynda atqaryp kele jatqan jumysyn joǵary baǵalady. Sondaı-aq ol Álemdik jáne dástúrli dinder lıderleriniń sezi aıasynda Keńespen belsendi is-qımyl qalyptasqany úshin rızashylyǵyn bildirip, ózara yntymaqtastyqty odan ári nyǵaıtýǵa daıyn ekenin jetkizdi.