Senat tóraǵasy Máýlen Áshimbaev bastaǵan delegatsııa Tájikstanda birqatar kezdesý ótkizdi
Baspasóz qyzmetiniń málimetterine qaraǵanda, sapar barysynda senatorlar Tájikstan Prezıdenti Emomalı Rahmonmen kezdesti. Sondaı-aq atalǵan eldiń Konstıtýtsııasynyń 30 jyldyǵyna arnalǵan halyqaralyq parlamenttik konferentsııaǵa qatysty jáne TMD elderi Parlamentteriniń depýtattarymen ekijaqty kezdesýler ótkizdi.
Tájikstan Respýblıkasynyń Prezıdenti Emomalı Rahmonmen kezdesýde Senat spıkeri atalǵan eldiń basshysyna Qazaqstan Prezıdenti Qasym-Jomart Toqaevtyń jyly lebizin jetkizdi. Sondaı-aq ol eki eldiń arasyndaǵy dostyq qarym-qatynas pen Memleket basshylarynyń syndarly jáne senimdi dıalogy ózara tıimdi yntymaqtastyqtyń kepili ekenin atap ótti.
«Tájikstan Respýblıkasy Konstıtýtsııasynyń 30 jyldyǵy» atty halyqaralyq parlamenttik konferentsııada sóz sóılegen Máýlen Áshimbaev Qazaqstan men Tájikstan arasynda qalyptasqan ózara túsinistik pen senimniń joǵary deńgeıine jáne onyń mańyzyna erekshe toqtaldy.
«Joǵary deńgeıdegi turaqty kezdesýler, belsendi saıası dıalog, túrli saladaǵy nátıjeli yntymaqtastyq qazaq-tájik qarym-qatynasynyń damý qarqynyn jáne zor áleýetin aıqyn kórsetedi. Bul rette saýda-ekonomıkalyq baılanystardy, mádenıet pen bilim berýge qatysty jobalardy, ekologııalyq jáne basqa salalardaǵy birlesken bastamalardy atap ótken jón. Qazaqstan men Tájikstan arasynda senimdi jáne jemisti qarym-qatynas ornady. Bıylǵy tamyzda Qazaqstan Prezıdenti Qasym-Jomart Kemeluly Toqaevtyń Tájikstanǵa sapary jáne sol kezde qol jetkizilgen ýaǵdalastyqtar osy aıtylǵandardy kezekti ret naqtylaı tústi. Atalǵan sapar kezinde elderimiz arasynda Odaqtastyq qatynastar týraly tarıhı shartqa qol qoıyldy. Bul mańyzdy qujat jańa múmkindikterge jol ashady. Sondaı-aq elderimiz arasyndaǵy jan-jaqty yntymaqtastyqty odan ári keńeıtýdiń berik negizin qalaıdy», – dedi Senat tóraǵasy.
Sonymen qatar Máýlen Áshimbaev atalǵan konferentsııa konstıtýtsııalyq quqyqty damytýdyń negizgi máselelerin talqylaýǵa jáne qazirgi almaǵaıyp jaǵdaıda bıliktiń zańnamalyq tarmaqtarynyń tabysty tájirıbesimen bólisýge zor múmkindik beretinin tilge tıek etti.
«Parlamentterdiń qyzmeti quqyqtyq júıeniń turaqtylyǵy men boljamdylyǵyn qamtamasyz etýge, jańa syn-qaterlerge ýaqtyly den qoıýǵa jáne týyndaıtyn problemalardyń tıimdi sheshimderin tabýǵa arnalǵan. Bizdiń elderimizdiń aldynda turǵan mindetter men máselelerdiń kóp jaǵdaıda uqsas ekenin eskersek, bıliktiń zań shyǵarýshy tarmaqtarynyń ózara is-qımyly asa mańyzdy ekenin ańǵaramyz. Parlamentaralyq yntymaqtastyq memleketterimiz arasyndaǵy baılanystardy nyǵaıtýdyń, tájirıbe almasýdyń jáne ózekti máseleler boıynsha ortaq sheshimder ázirleýdiń negizgi tetikteriniń biri ekeni anyq. Qazirgi syn-qaterler bizden tıimdi dıalog pen aǵymdaǵy jáne bolashaqtaǵy jahandyq ózgeristerge sáıkes zańnamalyq tetikterdi birlesip ázirleýdi talap etedi. Bul rette ortaq kúsh-jigerimizdi úılestirýde parlamenttik dıplomatııa sheshýshi ról atqarady», – dedi Máýlen Áshimbaev.
Sapar kezinde birqatar ekijaqty kezdesý ótti. Reseı Federatsııasy Federaldyq jınalysy Federatsııa keńesiniń Tóraǵasy Valentına Matvıenkomen kezdesýde zań shyǵarýshy organdar jelisi boıynsha ózara is-qımyldy nyǵaıtý perspektıvalary talqylandy. Taraptar eki Palata arasyndaǵy yntymaqtastyq jónindegi komıssııa jumysynyń qorytyndylaryna da nazar aýdardy. Sondaı-aq 2025-2026 jyldarǵa arnalǵan Parlamentaralyq yntymaqtastyqty damytý jónindegi jańa Jol kartasyna qol qoıý máselesin qarady. Bul Qujatta Qazaqstan men Reseı Prezıdentteri belgilep bergen yntymaqtastyqtyń basym baǵyttary kórsetiledi.
Sondaı-aq Qazaqstan delegatsııasy Tájikstan Madjlısı Olı Madjlısı mıllı tóraǵasy Rýstamı Emomalımen kezdesti. Onda parlamentaralyq yntymaqtastyqtyń naqty baǵyttary keńinen talqylandy. Atap aıtqanda, parlamentaralyq baılanystardy nyǵaıtýdyń negizin qalap, yntymaqtastyqty odan ári damytýdyń basym baǵyttaryn aıqyndap bergen Túrkistan deklaratsııasyn iske asyrý aıasyndaǵy birlesken jumys týraly sóz boldy. Suhbattasýshylar birlesken kúsh-jigerdi óńirdi ekonomıkalyq turǵyda damytýǵa, Ornyqty damý maqsattaryn iske asyrýǵa, adam kapıtalyn nyǵaıtýǵa jáne qazirgi syn-qaterlerdi eńserýge jumyldyrý qajet ekenine basa mán berdi.
Ázerbaıjan Mıllı Májilisiniń Spıkeri Sagıba Gafarovamen kezdesýde Máýlen Áshimbaev áriptesin jańa merzimge qaıta saılanýymen quttyqtap, eki el arasyndaǵy yntymaqtastyq halyqtardyń ortaq tarıhı qundylyqtaryna jáne ózara qurmet pen túsinistikke taban tireıtinin atap ótti. Budan basqa, Senat tóraǵasy Ázerbaıjan tarapyna Álemdik jáne dástúrli dinder lıderleri Sezine turaqty qoldaý kórsetip kele jatqany úshin alǵys aıtyp, atalǵan eldiń ókilderi 2025 jyly ótetin Sezge qatysatynyna senim bildirdi.
Máýlen Áshimbaev Konferentsııa alańynda basqa da Parlament delegatsııalarynyń basshylarymen birqatar kezdesý ótkizdi.