Senat tóraǵasy: Qazaq tilindegi qujattarda qatelik bolmaýy tıis

<p>ASTANA. KAZINFORM &mdash; Halyqaralyq kelisimderde qazaq tilindegi mátinde qatelik bolmaýy tıis. Bul jóninde Senattyń jalpy otyrysynda palata tóraǵasy Máýlen Áshimbaev Qazaqstan men Ózbekstannyń ekologııa salasyndaǵy yntymaqtastyǵy týraly kelisimdi talqylaý barysynda aıtty.</p>

Otyrys kezinde atalǵan qujattyń qazaq tilindegi mátininde qatelikter ketkeni belgili boldy. Senat tóraǵasy mundaı olqylyqqa jol berýge bolmaıtynyn basa aıtty.

«Qazaq tilindegi qujattarda qatelerdiń kezdesýi búgin paıda bolǵan másele emes. Bul problemany depýtattarymyz da únemi kóterip júredi. Sol sebepti, qazirgi tańda qazaq tilindegi mátinnen qate jiberip, ony qaıta túzetý orynsyz», – dedi M. Áshimbaev.

Sondaı-aq ol qazirgi tańda elimizde memlekettik tildiń mártebesi nyǵaıyp, osy salada kásibı mamandardyń qatary artqanyna nazar aýdardy. Sondyqtan Senat tóraǵasy bul salada tıisti mamandarmen jumysty kúsheıtý kerek ekenin aıtty.

«Búginde shet tilderdegi irgeli ǵylymı eńbekterdi qazaq tiline aýdaryp júrgen bilikti mamandarymyz bar. Sońǵy jyldarda olar belsendi jumys istep keledi. Ony bárimiz kórip otyrmyz. Sondyqtan bizde túrli termındermen jumys isteıtin, qalyptasqan mamandar jetkilikti dep aıtýǵa ábden bolady. Sol sebepti, qujattarda qazaq tilindegi mátinde qatelik bolmaýǵa tıis. Al, halyqaralyq kelisimderde buǵan múldem jol berýge bolmaıdy. Sondyqtan tıisti vedomstvo osy máseleden qorytyndy shyǵaryp, kásibı mamandarmen jumys isteýge tıis. Aldaǵy ýaqytta mundaı olqylyq qaıtalanbaıdy dep senemiz», – dedi Máýlen Áshimbaev.

Aıta keteıik, búgin Palata otyrysynda senatorlar «Qazaqstan Respýblıkasynyń Úkimeti men Ózbekstan Respýblıkasynyń Úkimeti arasyndaǵy ekologııa jáne qorshaǵan ortany qorǵaý salasyndaǵy yntymaqtastyq týraly kelisimdi ratıfıkatsııalaý týraly» Zańdy qarap, maquldady.