Senat tóraǵasy eýrokomıssııanyń vıtse-prezıdentimen kezdesti
Kezdesýdi ashqan Máýlen Áshimbaev Eýropalyq Odaq Qazaqstannyń strategııalyq seriktesi ekenin jáne elimiz ekijaqty qarym-qatynasty nyǵaıtýǵa basa mán beretinin atap ótti.
«Byltyr Qazaqstan Prezıdenti Qasym-Jomart Kemeluly Toqaev pen Eýropalyq Keńestiń Prezıdenti Sharl Mıshel taraptar arasyndaǵy yntymaqtastyqtyń serpindi damyp kele jatqanyn atap ótti. Bizdiń depýtattar «Qazaqstan Respýblıkasy – Eýropalyq Odaq» parlamenttik yntymaqtastyq komıtetiniń jumysyna belsendi qatysyp keledi. Qazaqstan Parlamentiniń Senaty eýropalyq áriptesterimizben parlamentaralyq baılanystardy odan ári jandandyrýǵa, ortaq múddeni kózdeıtin máseleler boıynsha turaqty, mazmundy dıalogty ári qaraı jalǵastyrýǵa daıyn», – dedi Senat Tóraǵasy.
Sondaı-aq Palata Spıkeri Memleket basshysynyń bastamasymen Qazaqstanda júzege asyrylyp jatqan saıası jáne áleýmettik-ekonomıkalyq reformalarǵa toqtalyp ótti.
«Elimiz adam quqyqtaryn qorǵaýǵa tolyqtaı beıildi jáne osy baǵyttaǵy reformalardy belsendi túrde júrgizip keledi. Byltyrǵy 8 jeltoqsanda Qasym-Jomart Kemeluly Toqaev adam quqyqtary men zańdylyqty qamtamasyz etý salasyndaǵy jańartylǵan is-sharalar josparyn bekitti. Ol genderlik teńdikten bastap, eńbek qaýipsizdigi men eńbekti qorǵaýǵa deıingi bastamalardy qamtıdy. Bul bizdiń adam quqyqtary salasyndaǵy halyqaralyq standarttardy únemi jetildirýge jáne saqtaýǵa degen umtylysymyzdy kórsetedi. Osy oraıda elimizde keshendi reformalar baǵdarlamasyn júzege asyrýda únemi qoldaý kórsetip kele jatqany úshin Eýropalyq Odaqqa alǵys aıtamyz»,– dedi Máýlen Áshimbaev.
Sonymen qatar kezdesýde saýda-ekonomıkalyq, ınvestıtsııalyq yntymaqtastyqty keńeıtý, onyń ishinde Transkaspıı halyqaralyq kólik baǵytyn damytý máseleleri talqylandy. Máýlen Áshimbaev ornyqty damý jáne osy baǵyttaǵy birlesken is-qımyldardy qabyldaý máselelerine de toqtaldy.
Óz kezeginde Margarıtıs Shınas Qazaqstannyń reformalardy iske asyrý baǵytynyń tıimdiligin atap ótip, jan-jaqty qatynasty ári qaraı nyǵaıtýǵa múddeli ekenin jetkizdi.