Senat TMD elderindegi sanıtarııalyq qorǵaýǵa qatysty zańdy maquldady
Atalǵan kelisimge 2021 jylǵy 28 mamyrda Mınsk qalasynda qol qoıylǵan. Qujatqa Táýelsiz Memleketter Dostastyǵyna qatysýshy 11 eldiń 8-i qol qoıǵan (Ázerbaıjan, Armenııa, Belarýs, Qazaqstan, Qyrǵyzstan, Reseı, Tájikstan jáne Ózbekstan).
Zańnyń negizgi maqsaty – TMD-ǵa múshe memleketterdiń aýmaqtaryn sanıtarııalyq qorǵaý salasyndaǵy yntymaqtastyq týraly kelisimdi ratıfıkatsııalaý. Bul zań osy memleketter azamattarynyń sanıtarııalyq-epıdemıologııalyq salaýattylyǵyn qamtamasyz etýge baǵyttalǵan. Qujat halyqtyń densaýlyǵyn qorǵaý úshin Táýelsiz Memleketter Dostastyǵy memleketteriniń aýmaqtarynda yqtımal qaýipti taýarlardyń ótkizilýi jáne ınfektsııalyq aýrýlardyń syrttan kelýi men taralýy múmkindigine tosqaýyl bolady.
«Kelisim asa qaýipti aýrýlardyń, sondaı-aq tótenshe jaǵdaılarǵa baılanysty ınfektsııalyq aýrýlardyń aldyn alý jónindegi kelisilgen is-sharalardy júrgizýdi kózdeıdi. Aýrýlardyń tolyq tizbesi osy Kelisimniń qosymshasynda aıqyndalǵan. Buǵan deıin, 2001 jylǵy Kelisimdegi tizbege 18 aýrý kirse, osy Kelisimde 24-ke kóbeıtilip, halyqaralyq medıtsınalyq-sanıtarııalyq erejelerdiń talaptaryna sáıkes keltirilip otyr. Kelisimde ulttyq zańnamaǵa sáıkes baqylaýǵa jatatyn taýarlardyń tizbesi de qaıta qaralyp, Eýrazııalyq ekonomıkalyq odaǵynyń elderinde baqylaýǵa jatatyn taýarlardyń biryńǵaı tizbesimen sáıkestendirildi», - dedi senator Aqmaral Álnazarova.
Sonymen qatar, Kelisimde taraptardy jedel habardar etý, epıdemııaǵa qarsy is-sharalardy júrgizýde praktıkalyq, tehnıkalyq kómek kórsetý jónindegi mindettemeleri aıqyndalǵan. Tótenshe jaǵdaılardyń týyndaý múmkindigine baılanysty asa juqpaly aýrýlardyń anyqtalýy men taralýy jáne sanıtarııalyq qorǵaý salasyndaǵy ǵylymı-zertteý jumystary týraly aqparat almasý mindeti engizilgen. Osy máseleler boıynsha ár taraptyń ózara is–qımylyn úılestirý TMD-ǵa qatysýshy memleketterdiń bas memlekettik sanıtarııalyq dárigerleriniń Keńesine júkteledi.
«Osy oraıda, Kelisimdi ratıfıkatsııalaý asa qaýipti aýrýlardan týyndaıtyn tótenshe jaǵdaılardyń aldyn alýǵa múmkindik beredi jáne elimizdiń halyq densaýlyǵyna oń septigin tıgizedi. Jalpy, Zańdy qabyldaý teris jáne ózge de jaǵymsyz áleýmettik-ekonomıkalyq jáne quqyqtyq saldarǵa ákep soqtyrmaıdy», - dedi depýtat.