Senat taýarlardyń erkin qozǵalysyna jaǵdaı jasaýǵa negizdelgen qujatty qabyldady

NUR-SULTAN. QazAqparat – QR Parlamenti Senatynyń jalpy otyrysynda «Memleketaralyq standarttaý jónindegi qujattardy taratý týraly kelisimdi ratıfıkatsııalaý týraly» Zańy qabyldandy, dep habarlaıdy QazAqparat tilshisi.

Jobanyń maqsaty - Táýelsiz Memleketter Dostastyǵyna múshe elder arasynda memleketaralyq standarttaý jónindegi qujattardy taratýdyń biryńǵaı qaǵıdattaryn qalyptastyrý.

«Birinshiden, standarttardy taratýǵa ár elde tek bir uıym ǵana quqyly. Bul standarttaý jónindegi ulttyq organ nemese ol ýákilettik bergen uıym bolýy múmkin. Táýelsiz Memleketter Dostastyǵynyń keıbir elderinde standarttardy taratýǵa quqyly ártúrli uıymdar bar. Bizde bul másele sheshildi. Eki jyl buryn kúshine eńgizilgen «Standarttaý týraly» Qazaqstan Respýblıkasy Zańy boıynsha bul quqyq Qazaqstan metrologııa jáne standarttaý ınstıtýtyna bekitildi. Ekinshiden, Táýelsiz Memleketter Dostastyǵyna múshe memleketterdiń memleketaralyq standarttardy ruqsatsyz taratýdan qorǵaýdy zańnamalyq deńgeıde qamtamasyz etý. Bizdiń ulttyq zańnamamyz mundaı faktilerdi anyqtaý is-sharalaryn qarastyrmaıdy. Osyǵan baılanysty, biz standarttardy ruqsatsyz taratqany úshin ákimshilik aıyppul engizý boıynsha óz usynystarymyzdy daıyndadyq», - dedi Saýda jáne ıntegratsııa mınıstri Baqyt Sultanov.

Onyń aıtýynsha, usynystar Ákimshilik kodekske ózgeristerdiń ortalyqtandyrylǵan paketin qalyptastyrý kezinde esepke alý úshin Ádilet mınıstrligine jiberildi. Basqa elderde mundaı tájirıbe bar. Mysaly, Belarýs Respýblıkasynda zań buzýshylyqtar úshin aıyppuldar qarastyrylǵan, al memleketaralyq standarttardy ruqsatsyz taratý qyzmeti zańsyz bolyp sanalady.

«Úshinshiden, ózara is-qımyldy úılestirý Standarttar jónindegi bıýro arqyly ortalyqtandyrylyp júzege asyrylatyn bolady. Mundaı tásil iske asyrylatyn memleketaralyq standarttardy ortalyqtandyrylǵan esepke alýdy, olardy paıdalanýdyń zańdylyǵy men qajettiligin qamtamasyz etýge baǵyttalǵan. Búgingi tańda Kelisimge qol qoıǵan kóptegen elder - Reseı Federatsııasy, Belarýs Respýblıkasy, Qyrǵyz Respýblıkasy, Moldova jáne Ózbekstan Respýblıkalary memleketishilik rásimderdi aıaqtady», - dedi mınıstr.

Osy kelisimdi ratıfıkatsııalaý mynadaı máselelerdi sheshýdi qamtamasyz etedi; m emleket úshin - memleketaralyq standarttardy zańdy taratý, olardy osy zamanǵa beıimdeý úshin quqyqtyq negiz jasaıdy; bıznes úshin - shyǵyndardy azaıtady.

«Jalpy alǵanda, Kelisimniń qabyldanýy taýarlardyń erkin qozǵalysyna jáne halyqaralyq saýda jelisine yqpaldasýǵa jaǵdaı jasaıdy», - dedi B. Sultanov.