Senat: Taldaý mektebiniń ekinshi kezeńi aıaqtaldy
Eki aıǵa jalǵasqan ekinshi kezeńde Taldaý mektebiniń tyńdaýshylary analıtıkalyq materıaldar daıarlaýdyń túrli daǵdylaryn meńgerip, qabiletterin jetildirdi. Búgin oqytý kýrsynyń sońǵy dárisinde tyńdaýshylar komandalyq jobalaryn usyndy.
Taldaý mektebiniń alǵashqy kezeńindegideı bul joly da 8 aptalyq kýrs teorııalyq jáne praktıkalyq bloktarǵa bólindi. Dáris oqý úshin belgili qazaqstandyq jáne sheteldik sarapshylar shaqyryldy. Olar túrli analıtıkalyq ádister men tásilder týraly dárister oqyp, sheberlik sabaqtary men trenıngter ótkizdi. Sabaqtar qazaq, orys jáne aǵylshyn tilderinde júrgizildi.
Ekinshi kezeńniń sońǵy kúninde Máýlen Áshimbaev analıtıkalyq tásilderdi kúsheıtýdiń mańyzdy ekenin aıtyp, komandalyq jobalardy qorytyndylady. Oqytý kýrsynyń basynda irikteýden ótken 60 qatysýshy on komandaǵa bólingen edi. Olardyń árqaısysy aımaqtyq máselelerdiń bir baǵytyna arnalǵan taqyryptardy tańdap aldy.
«Taldaý mektebiniń ekinshi kezeńi Qazaqstannyń óńirlik damý máseleleri men perspektıvalaryna arnaldy. Kýrs aıasynda 32 saǵatty quraǵan dárister, sheberlik sabaqtary jáne trenıngter ótkizildi. Tyńdaýshylarǵa belgili otandyq jáne sheteldik sarapshylar, analıtıkter jáne ǵalymdar dáris oqydy. Osy joba sizderdiń kásibı maman jáne tulǵa retinde qalyptasýlaryńyzǵa óziniń zor septigin tıgizedi dep úmittenemin. Sol jolda sáttilik tileımin», - dedi Senat tóraǵasy.
Sonymen qatar, Máýlen Áshimbaev aldaǵy ýaqytta mekteptiń jumysy túrli formatta jalǵasatynyn jáne oǵan qatysýshylar Senattyń zań shyǵarý qyzmeti men Palata iske asyratyn jobalarǵa jumyldyrylatynyn aıtty.
Oqytý kýrsynyń qorytyndy kúninde tyńdaýshylar úshin jýrnalıst Erbolat Muhamedjan men saıasattanýshy Ǵazız Ábishev tok-shoý formatynda trenıng ótkizdi. Sonyń aıasynda qatysýshylar taldaý barysynda pikirtalas ádisterin jáne kópshilik aldynda sóıleý daǵdylaryn is júzinde qoldandy.
Aıta keteıik, Taldaý mektebiniń ekinshi kezeńindegi dárister YouTube platformasyndaǵy resmı arnasynda jarııalanady.