Senat spıkeri: Reformalardyń máni – azamattardyń memleket isine aralasý múmkindigin arttyrý

NUR-SULTAN. QazAqparat – Reformalardyń máni – demokratııany nyǵaıtý, azamattardyń memleket isine aralasý múmkindigin arttyrý. QR Parlamenti Senatynyń tóraǵasy Máýlen Áshimbaev Konstıtýtsııaǵa ózgeris engizý boıynsha referendým týraly osyndaı pikir bildirdi, dep habarlaıdy QazAqparat.

«Prezıdentimiz Qasym-Jomart Kemeluly Toqaev konstıtýtsııalyq ózgerister boıynsha jalpyulttyq referendým ótetin kúndi jarııalady. Referendým 5 maýsymǵa belgilendi.​ Elimiz túbegeıli ózgeristerdiń aldynda tur. Onyń negizgi qozǵaýshy kúshi – osy konstıtýtsııalyq reformalar bolmaq. Bul reformalardyń máni – elimizdegi demokratııany nyǵaıtý, azamattardyń memleket isine aralasý múmkindigin arttyrý. Mine, sondyqtan, Prezıdentimiz Ata zańǵa engizilgen ózgeristerdi halyqtyń talqysyna salyp, kópshiliktiń sheshimine súıenip qabyldaýdy kózdep otyr», - dep jazdy palata spıkeri Facebook-te. ​

M.Áshimbaev konstıtýtsııalyq ózgerister aıasynda sýperprezıdenttik basqarý modelinen alshaqtaıtynymyzdy eske saldy.

«Parlamenttiń jáne jergilikti ókildi organdardyń yqpaly arta túsedi. Quqyq qorǵaý organdaryna qatysty da sheshýshi ózgerister oryn almaq. Mine, munyń barlyǵy azamattar múddesiniń, quqyǵynyń laıyqty qorǵalýyna, olardyń úniniń bıik minberlerge kedergisiz jetýine kepil bolady.

​Prezıdent úndeýinde elimizdiń aldynda jańa jáne ádiletti Qazaqstan qurý mindeti turǵanyn taǵy bir márte eske saldy. Jarııalanǵan konstıtýtsııalyq reformalar osy mindetti tabysty júzege asyrý úshin qajet ekenin jetkizdi jáne azamattardy aldaǵy referendýmǵa belsendi qatysýǵa shaqyrdy.​

Referendým – birligimizdi aıshyqtaıtyn aıtýly saıası oqıǵa. Azamattarymyz Memleket basshysy aıqyndaǵan saıası jańǵyrý bastamalaryn qoldaıdy dep senemiz.

Elimiz aman, jurtymyz tynysh, birligimiz bekem bolsyn! Jańa Qazaqstandy qurýǵa birge atsalysaıyq», - dep jazdy Senat spıkeri.