Senat Spıkeri Ońtústik Koreıa elshisimen kezdesti
Kezdesýde taraptar eki eldiń basshylyǵy júrgizgen jumystardyń nátıjesinde sońǵy jyldarda Qazaqstan men Ońtústik Koreıa arasyndaǵy qarym-qatynastyń aıasy keńeıip, strategııalyq seriktestikke jalǵasqanyn atap ótti.
Máýlen Áshimbaev «qańtar oqıǵasynan» keıin Qazaqstanda qolǵa alynǵan mańyzdy jańǵyrtýlarǵa toqtaldy. Senat Spıkeri qazirgi tańda el azamattary Memleket basshysy Qasym-Jomart Toqaev usynǵan «Jańa Qazaqstan» tujyrymdamasyn keńinen talqylap jatqanyn aıtty.
«Búginde Senat jumysynyń negizgi baǵyttarynyń biri el Prezıdentiniń jańǵyrý baǵdaryn zańnamalyq turǵydan qoldaý. Qolǵa alynǵan reformalardy iske asyrý kezinde áleýmettik teńsizdik pen kedeılikke qarsy kúres jáne saıası júıeni odan ári demokratııalandyrý asa mańyzdy basymdyqtar bolyp belgilendi. Jańa kún tártibinde de ekonomıkalyq reformalardyń mańyzy zor. Senatorlar bul jumystardyń tabysty iske asyrylýy úshin qajetti zańdardy jedel qabyldaýǵa daıyn» , – dedi Máýlen Áshimbaev.
Óz kezeginde Elshi Qazaqstan Prezıdentiniń bastamasymen júrgizilip jatqan reformalardyń mańyzdy ekenin aıtty. Sondaı-aq resmı Seýl Qazaqstannyń elde áleýmettik teńsizdikti jáne kedeılikti tómendetýge arnalǵan baǵyt-baǵdaryn tolyq qoldaıtynyn jetkizdi.
Sonymen qatar suhbattasýshylar Ýkraınadaǵy oqıǵalarǵa nazar aýdardy. Eki tarap ta jaǵdaıdy beıbit jolmen sheshýdiń mańyzdy ekenine basymdyq berdi. Máýlen Áshimbaev, buǵan deıin Memleket basshysy atap ótkendeı, Qazaqstannyń gýmanıtarlyq kómek kórsetýge jáne kelissózder júrgizý úshin araaǵaıyndyq tanytýǵa daıyn ekenin tilge tıek etti.
Kezdesý sońynda taraptar Qazaqstan men Ońtústik Koreıa arasyndaǵy yntymaqtastyqty odan ári arttyrýǵa jáne ózara is-qımyldy keń aýqymda júrgizýge eki el de múddeli ekenin aıtty.