Senat sottalǵan áıelderge qatysty zańnamaǵa túzetý engizdi
Qujatqa engizilgen túzetýler Memleket basshysynyń Joldaýlary kezinde berilgen tapsyrmalardy iske asyrýǵa, Qylmystyq, Qylmystyq-protsestik jáne Qylmystyq-atqarý kodeksteriniń normalaryn jetildirýge arnalǵan. Senat engizgen 45 túzetýdiń qatarynda azaptaǵany úshin jaýapkershilikti kúsheıtýge, qatygez, adamgershilikke jatpaıtyn nemese qadir-qasıetin qorlaıtyn qarym-qatynas úshin qylmystyq jaýapkershilikti engizýge, otbasyndaǵy zorlyq-zombylyq jáne taǵy basqa da máselelerge qatysty normalar bar.
Qujatty talqylaý kezinde QR Іshki ister mınıstri Marat Ahmetjanov túrmede balamen otyrǵan áıelderge qatysty zańǵa ózgeris engiziletinin aıtty.
«Qylmystyq-atqarý kodeksinde sottalǵan áıelderdiń balalarymen úsh jasqa tolǵanǵa deıin kolonııalarda bolýy kózdelgen (QAK 116-baby).
Elimizde osyndaı 1 kolonııa bar. Búldirshinder Balalar úıine ornalastyrylady. Áıelder balalaryn shekteýsiz, jumystan bos ýaqytta kóre alady. Alaıda úsh jasqa tolǵannan keıin, balalar jaqyn týystaryna nemese balalar úılerine beriledi. Osy oraıda áleýmettik baılanystardy saqtaý maqsatynda sottalǵan áıelderge balasyn 4 jasqa deıingi qaldyrýǵa múmkindik beretin norma eskerilgen. Biraq munyń bir sharty bar, ıaǵnı áıel adamnyń bosatylýyna deıin bir jyldan az ýaqyt qalýy tıis», - dedi mınıstr.
Óz kezeginde Senat tóraǵasy Máýlen Áshimbaev atalǵan zańǵa qatysty pikir bildirdi.
«Prezıdent adam quqyqtary jáne zań ústemdigi boıynsha qabyldanýy qajet sharalardy aıqyndap berdi. Búgin qabyldanǵan zań adamnyń qylmystyq sot tóreligi, jazany atqarý jáne azaptaýlar men qatygez is-áreketterdiń aldyn alý salasyndaǵy quqyqtaryn kúsheıtýge arnalǵan. Onyń ishinde aýyr syrqatqa shaldyqqandardyń, kishkentaı balasy bar analardyń, alǵash ret sottalǵandardyń quqyqtyryn qamtamasyz etý máseleleri qamtylǵan. Aldaǵy ýaqytta zań adam quqyqtary men bostandyqtaryn qorǵaý tetikterin jetildirýge oń áserin tıgizedi dep senemiz», – dedi M. Áshimbaev.