Senat «Sot ádildigine halyqaralyq qoljetimdilik týraly konventsııany ratıfıkatsııalaý týraly» Zań jobasyn qaraıdy

ASTANA. QazAqparat - QR Parlamenti Senatynyń Konstıtýtsııalyq zańnama, sot júıesi jáne quqyq qorǵaý organdary jónindegi komıtetiniń keńeıtilgen otyrysynda «Sot ádildigine halyqaralyq qoljetimdilik týraly konventsııany ratıfıkatsııalaý týraly» Zań jobasy talqylandy.

«Konventsııany ratıfıktsııalaýdaǵy maqsat bizdiń azamattardyń, sonymen qatar olardyń jeke, otbasylyq jáne iskerlik múddelerin quqyqtyq qorǵaýdy qamtamasyz etý bolyp tabylady. Osy Konventsııa 1954 jylǵy Azamattyq protsester máseleleri jónindegi Gaaga konventsııasymen tikeleı baılanysty», - dep atap ótti zań jobasyn tanystyrǵan QR Ádilet vıtse-mınıstri Záýresh Baımoldına.

Onyń BAQ ókilderine túsindirýinshe, Konventsııaǵa 31 memleket qatysýshy bolyp tabylady. Atalǵan qujat ratıfıkatsııalanǵannan keıin Qazaqstan azamattary Ádilet mınıstrligi jáne QR Joǵarǵy soty janyndaǵy sot qyzmetterin qamtamasyz etý jónindegi departament arqyly tikeleı sheteldik quziretti organdarǵa óz saýalyn jibere alady.

Komıtet atalǵan zań jobasyn talqylaǵannan keıin ony palatanyń jalpy otyrysynda qaraý týraly sheshim qabyldady.