Senat Sıngapýr naryǵyna Qazaqstannyń qyzmetter eksportyn ulǵaıtatyn zań qabyldady
«Eki el arasyndaǵy yntymaqtastyqty odan ári nyǵaıtý maqsatynda, bul kelisimge 2023 jylǵy 22 mamyrda Sıngapýr Respýblıkasynyń Prezıdenti Halıma ıAkobtyń Qazaqstan Respýblıkasyna resmı sapary barysynda qol qoıylǵan bolatyn. Kelisimniń negizgi mindetteri — taraptar arasyndaǵy qyzmetter saýdasy men ınvestıtsııalarǵa járdemdesý jáne lıberalızatsııalaý. Sıngapýr Qazaqstan úshin eń aldynǵy qatarly seriktesterdiń biri. Sebebi ol bárimizge belgili bolǵandaı, Ońtústik-Shyǵys Azııa aımaǵyndaǵy jáne jalpy álemdik ekonomıkadaǵy flagman, sondaı-aq iri IT jáne qarjy haby sanalady. Oǵan, árıne sıngapýrlyqtardyń kórsetiletin qyzmetterdegi, damýdyń ozyq tájirıbesi, ekonomıkalyq kórsetkishteri men ınnovatsııalyq jetistikteri dálel bola alady», — dedi senator Sultanbek Mákejanov.
Onyń dereginshe, 2013-2023 jyldary Sıngapýrdyń Kazaqstanǵa salǵan tikeleı ınvestıtsııalar aǵyny 1,7 mlrd, al Qazaqstannyń Sıngapýrǵa salǵan tikeleı ınvestıtsııalar aǵyny 1,4 mlrd dollardy quraǵan. Al, 2023 jyly ekijaqty taýar aınalymynyń kólemi 1,8 mlrd dollarǵa jetken. Onyń ishinde Qazaqstannyń Sıngapýrǵa eksporty — 1,7 mlrd dollar bolsa, Sıngapýrdan Qazaqstanǵa ımport 81 mln dollarǵa jetti. 2023 jyly kórsetiletin qyzmetterdiń eksporty Qazaqstannan Sıngapýrǵa 3,5 mln dollardy qurasa, al Sıngapýrdan Qazaqstanǵa qyzmetter ımporty 6 mln dollar boldy.
«Sondyqtan kelisim aıasynda Qazaqstan bıznesi úshin Sıngapýrde kórsetiletin qyzmetter naryǵyna qoljetimdilikti keńeıtip, jaqsartýǵa arnalǵan keshendi sharalar qaralǵan. Qazirgi tańda eki el arasyndaǵy kelisim aıasynda, máselen, Almaty oblysyndaǵy G4 City, ıaǵnı Alataý qalasyn damytý, Jambyl oblysyndaǵy tsement zaýytynyń qurylysy, Aqtaý portyn jańartý sııaqty 15 shaqty ınvestıtsııalyq jobalar engizilip otyr. Olarǵa jumsalǵan ınvestıtsııalar kólemi shamamen 681 mln dollardy quraıdy. Mınıstriklikterdiń aqparaty boıynsha ótken jyldyń sońyna Sıngapýr kapıtalynyń qatysýymen Qazaqstanda 143 zańdy tulǵa tirkelgen. Tutastaı alǵanda, kelisimdi ratıfıkatsııalaý Sıngapýr Respýblıkasynyń naryǵyna otandyq qyzmetter eksportynyń ósýin yqpal etip, Qazaqstanǵa sıngapýrlyq ınvestıtsııalar kóleminiń ulǵaıýyna járdemdesetin bolady», — dedi senator.