Senat saılaýyna Túrkistan oblysynan eki kandıdat qatysady
Bastapqyda óz kandıdatýrasyn 6 úmitker usynǵan bolatyn. Keıin bir úmitker otbasylyq jaǵdaıyna baılanysty qujattaryn keri qaıtaryp alǵan. Al, taǵy bir kandıtattyń múlik salyǵy jónindegi deklaratsııasyn tekserý kezinde shıkilik shyqqany úshin tirkeýden alynyp qaldy. 24 jeltoqsan kúni aımaqta 4 kandıdat úgit-nasıhat jumystaryn bastaǵanymen, keıin onyń ekeýi ótinishin qaıtaryp aldy.
Sonymen, saılaýda 2 úmitker baq synamaq. Olardyń biri – Qadyrbek Murat Bolatuly 1980 jyly Ońtústik Qazaqstan oblysy Shardara aýdanynda dúnıege kelgen. Bilimi joǵary: zańger, quqyqtaný magıstri. QR Prezıdenti janyndaǵy Memlekettik basqarý akademııasynyń túlegi. Jetisaı aýdanynyń ákimi.
Al, ekinshi úmitker – Aqmuratov Mırambek Jamadiluly 1976 jyly Ońtústik Qazaqstan oblysy Ordabasy aýdanynda dúnıege kelgen. Almaty ekonomıkalyq ýnıversıtetiniń túlegi. Qazirgi tańda Ordabasy aýdany ákimdiginiń apparat basshysy qyzmetin atqarady.
«Oblystyq aýmaqtyq saılaý komıssııasy 14 qańtarǵa belgilengen saılaýǵa daıyndyq jumystaryn qyzý júrgizip jatyr. Saılaý saǵat 11:00-de bastalady. Daıyndyq jumystary QR Ortalyq saılaý komıssııasynyń kúntizbelik bekitilgen is-sharasyna baılanysty talapqa saı atqaryldy», - deıdi oblystyq Aýmaqtyq saılaý komıssııasy tóraǵasynyń orynbasary Ámirdın Álishev.
Aıta keteıik, Qazaqstan Respýblıkasy Parlamenti Senatynyń saılaýy 14 qańtar kúni ótedi.