Senat saılaýyna qyzyǵýshylyq joǵary - OSK
Eske sala keteıik, Ortalyq saılaý komıssııasynyń otyrysynda shet memleketter men halyqaralyq uıymdardyń baıqaýshylaryn tirkeý týraly qaýly qabyldanǵan. Syrtqy ister mınıstrliginiń usynysy boıynsha TMD baıqaýshylar mıssııasynyń quramynda 103 baıqaýshyny, ShYU-dan - 4, shet memleketterden 22 baıqaýshyny tirkedi.
«Saılaý úderisiniń jarııalylyǵy men ashyqtyǵyn qamtamasyz etý boıynsha Ortalyq saılaý komıssııasy belsendi jumys júrgizip keledi. Baıqaýǵa qatysatyn halyqaralyq baıqaýshylar sany búgingi kúnge deıin tirkelgen baıqaýshylarmen shektelik qalmaıdy dep oılaımyn. Jalpy, Senat saılaýynyń janama ótetindigine qaramastan, saılaý naýqanyna degen qyzyǵýshylyq joǵary», - dep atap ótti OSK tóraǵasy Q. Turǵanqulov.
Sondaı-aq OSK basshysynyń aıtýynsha, qazir úmitkerler arasynda úgit naýqany qyzý júrýde. Máselen, barlyq óńirlerde úı-jaılar aıqyndalyp, kandıdattardyń tańdaýshylarmen kezdesý kesteleri qurylǵan. Іs júzinde kún saıyn respýblıkada 30-dan astam úgittik sharalar ótýde.
Bul rette 9 kandıdat ózderiniń saılaýaldy úgit naýqanynyń tıimdiligin arttyrý maqsatynda úgittik is-sharalardy júrgizý úshin ózderine respýblıkalyq bıýdjetten bólingen qarajatpen shektelip qana qoımaı, óz saılaý qorlaryn qurdy. Al buqaralyq aqparat quraldary monıtorınginiń derekterine sáıkes 2014 jylǵy 1 tamyz ben 19 qyrkúıek aralyǵyndaǵy kezeńde qazaqstandyq mass-medıada saılaý naýqanyna arnalǵan 580-nen astam materıal jarııalanǵan. Olardyń 102-si elektrondyq BAQ-ta, 52-si baspa jáne 425-ten astamy - ınternet jelisinde.
Eske sala ketsek, saılaýaldy úgit naýqany 29 qyrkúıek kúni 24.00 saǵatta aıaqtalady.