Senat saılaýy: Eń jas kandıdat - 37 jasta, eń úlkeni - 66-da

ASTANA. QazAqparat - 8 tamyzdaǵy jaǵdaı boıynsha aǵymdaǵy jylǵy 1 qazanda ótetin QR Parlamenti Senaty depýtattarynyń saılaýyna 79 kandıdat usynylǵan, olardyń ishindegi eń jasy 37-de bolsa, eń úlkeni - 66 jasta. Kandıdattardyń ortasha jasy 53 jasty quraıdy.

Bul týraly brıfıngte Ortalyq saılaý komıssııasy tóraǵasynyń orynbasary Vladımır Foos málim etti.

«Mamandyǵy boıynsha usynylǵan kandıdattardyń 29-y ınjener, 12-si ekonomıst, 11-i oqytýshy, 11-i aýyl sharýashylyǵy qyzmetkerleri (agronomdar, zootehnıkter, mal dárigerleri jáne basqalar), 10-y dáriger, 4-i zańger, 2-i basqa mamandyq ıeleri. Al qyzmet túri boıynsha 4-i Parlament Senatynyń depýtaty, 33-i memlekettik organdar, uıymdar, kásiporyndar jáne mekemeler qyzmetkerleri, 28-i kommertsııalyq qurylymdar qyzmetkerleri, 13-i ǵylym, mádenıet, bilim berý jáne densaýlyq qorǵaý qyzmetkerleri, 1-i basqa salaǵa jatady», - deıdi V. Foos.

Onyń aıtýynsha, usynylǵan kandıdattardyń árqaısysy aldaǵy ýaqytta Ortalyq saılaý komıssııasynyń arnaıy shotyna 300 myń teńge mólsherinde saılaý jarnasyn depozıt retinde engizýi tıis. Sonymen qatar kandıdat pen onyń zaıyby (jubaıy) tirkelgenge deıin turǵylyqty jeri boıynsha salyq organdaryna tabysy men múlki týraly deklaratsııa tapsyrýǵa mindetti.

«Ortalyq saılaý komıssııasynyń bekitken kúntizbelik josparǵa sáıkes kandıdattardy usyný 31 tamyzǵa deıin jalǵasady. Kandıdattardy tirkeýdi oblystyq, Astana jáne Almaty qalalyq saılaý komıssııalary 11 qyrkúıekke deıin júzege asyrady», - dedi V. Foos.