Senat saılaýy: depýtattyq korpýs sapalyq turǵydan ózgeredi - Máýlen Áshimbaev
«Búgin Qazaqstan Respýblıkasynyń Prezıdenti Qasym-Jomart Kemeluly Toqaevty saltanatty ulyqtaý rásimi ótti. Osylaısha, Memleket basshysy óziniń jeti jyldyq qyzmetine resmı túrde kiristi. Bul – elimizdiń saıası ómirindegi aıtýly oqıǵa ekeni sózsiz.
Ótken saılaýda azamattarymyz Qasym-Jomart Kemelulyna zor senim bildirip, ádilettilikke taban tireıtin memleket, ekonomıka jáne qoǵam qurý baǵdarlamasyn qyzý qoldaǵany belgili. Prezıdentimiz ultymyzdyń osy úmitin aqtaý óziniń aldaǵy basty mindeti bolatynyn jarııalady», - dep jazady Senat tóraǵasy.
Sonymen qatar, Memleket basshysynyń saılaý aldynda berilgen ýádelerdi iske asyrýǵa jol ashatyn bastapqy ári naqty jumys baǵdarlaryn aıqyndap kórsetkenine toqtalady.
«Prezıdentimiz óz sózinde zań aldynda báriniń teń bolýy – memleketimizdiń uzaq merzimdi damýynyń negizgi sharty ekenin qadap aıtty. Osy jolda elden zańsyz shyǵarylǵan barlyq aktıvti qaıtarý mańyzdy mindetke aınalyp keledi. Bul úshin zańsyz shetel asqan kapıtaldy qaıtarýǵa qajetti rásimderdi retteıtin zań jobasy ázirlenetinin jetkizdi.
Sondaı-aq, Prezıdentimiz óńirlerdi, onyń ishinde aýyldarymyzdy órkendetýge aıryqsha kóńil bólip otyr. Osyǵan baılanysty Qasym-Jomart Kemelulynyń jańa prezıdenttik merzimdegi birinshi Jarlyǵy aýyldy damytý máselesin sheshýge arnaldy. Sonymen birge, aýqymdy ındýstrııalandyrý, ınfraqurylymdardy salý jáne jańǵyrtý isi de tyń serpinmen qolǵa alynady.
Memleket basshysy óz sózinde Konstıtýtsııaǵa sáıkes bılik tarmaqtary túgel jańǵyrtylatynyn aıtty. Osyǵan sáıkes aldaǵy jyldyń 14 qańtarynda Senat depýtattarynyń saılaýy ótedi. Bul bizdiń depýtattyq korpýstyń sapalyq turǵydan ózgerip, óz jumysyn jańa mindetter aıasynda laıyqty jalǵastyrýyna múmkindik beredi.
Ádiletti Qazaqstandy qurý – barshamyzdyń ortaq maqsatymyz. Osy jáne alda jarııalanatyn basqa da bastamalar men mindetterdi zańnamalyq turǵydan sapaly ári ýaqtyly qamtamasyz etý Senattyń aldyndaǵy basty mindeti bolyp qala beredi», - deıdi Máýlen Áshimbaev.
Aıta keteıik, búgin Memleket basshysy Qazaqstan Respýblıkasy Parlamenti Senatynyń depýtattaryn saılaýdy 2023 jylǵy 14 qańtarǵa taǵaıyndaý týraly Jarlyqqa qol qoıdy.
Foto: senate.parlam.kz