Senat Reseımen áskerı yntymaqtastyq týraly zańdy qabyldady

NUR-SULTAN. QazAqparat – Senat «Qazaqstan Respýblıkasy men Reseı Federatsııasy arasyndaǵy áskerı yntymaqtastyq týraly shartty ratıfıkatsııalaý týraly» Zańyn qabyldady, dep habarlaıdy QazAqparat tilshisi.

«Qazaqstan Respýblıkasy men Reseı Federatsııasy 2020 jyldyń 16 qazanynda Nur-Sultan qalasynda áskerı yntymaqtastyq týraly shartqa qol qoıǵan.

Biz búgin osy shartty ratıfıkatsııalaý týraly zań jobasyn qarap otyrmyz. Jalpy Qazaqstan Respýblıkasy men Reseı Federatsııasy arasyndaǵy dostyq, yntymaqtastyq jáne ózara kómek týraly osy tektes shartqa 1992 jyldyń 25 mamyrynda qol qoıylǵan.

Keıin 2013 jylǵy 11 qarashada jańadan shart qabyldandy.

Sondyqtan búgingi zań – biz úshin tosyn jańalyq emes, burynǵy kelisimderdiń zańdy jalǵasy», - dedi Senat depýtaty Muhtar Qul-Muhamed.

Onyń sózine qaraǵanda, atalǵan zańda birneshe birlesken áreketter algorıtmi qarastyrylǵan. Olar:

- áskerdi qoldanýdy birlesip josparlaý;

- tóngen qaýipke qarsy birlesip áreket etý;

- áskerı jáne jedel daıarlyqty birlesip josparlaý;

- áskerı bilim men ǵylymdy ortaqtasa ıgerý;

- bitimgerlik kúshterdiń quramynda birlese áreket etý;

- mádenıet pen aqparat salasyndaǵy yntymaqtastyqty birlese atqarý máseleleri.

«Zań jobasy Senattyń barlyq komıtetterinde qaralyp, oń qorytyndylar kelip tústi. Bul – elimizdiń qorǵanystyq qabiletine qyzmet etetin zań», - dedi senator.