Senat ónim sapasyna qatysty zań qabyldady

NUR-SULTAN. QazAqparat – Parlament Senatynyń jalpy otyrysynda «EAEO-nyń tehnıkalyq reglamentterinde talaptar belgilenbegen ónimniń EAEO sheńberindegi aınalysynyń tártibi jáne mundaı ónimniń qaýipsizdigin qamtamasyz etý qaǵıdalary týraly kelisimdi ratıfıkatsııalaý týraly» Zańy qabyldandy, dep habarlaıdy QazAqparat tilshisi.

Qujattyń negizgi maqsaty - EAEO aýmaǵynda aınalystaǵy barlyq ónimderdiń qaýipsizdigin qamtamasyz etý. Bul Eýrazııalyq ekonomıkalyq odaq týraly sharttyń erejelerinen týyndaıdy.

«Búgingi tańda aınalysqa shyǵarylatyn ónimniń 85 paıyzy Eýrazııalyq ekonomıkalyq odaqtyń biryńǵaı tehnıkalyq reglamentterimen retteledi. Bul tamaq ónimderinen bastap, balalar ındýstrııasynyń taýarlary, jeńil ónerkásip, mashına jasaý jáne basqa da ónimder túrleriniń keń taýar nomenklatýrasyna arnalǵan tehnıkalyq reglamentter. Usynylyp otyrǵan zań jobasynda ónimniń qalǵan túrlerin retteý qarastyrylǵan. Birinshiden, bul EAEO-nyń biryńǵaı tehnıkalyq reglamentteri qabyldanbaǵan nemese kúshine enbegen ónimder. Ekinshiden, EAEO deńgeıinde ónimge qatysty mindetti talaptar belgilenetin ónimniń biryńǵaı tizbesine engizilmegen ónimder», - dedi Saýda jáne ıntegratsııa mınıstri Baqyt Cultanov.

Onyń aıtýynsha, ónimniń biryńǵaı tizbesi tutyný jáne paıdalaný kezinde qaýiptiligi joǵary táýekeldermen sıpattalatyn ónim túrlerin qamtıdy. Bul tizbe EAEO-ǵa múshe elderdiń jáne halyqaralyq tájirıbelerdi eskere otyryp ázirlengen.

«Biz osy Kelisimniń retteý obektisine jatatyn taýarlar nomenklatýrasyna taldaý jasadyq. Negizinen, bul áleýetti qaýip tóndirmeıtin ónimder. Búgingi tańda oǵan qoıylatyn talaptar joq. Tizim úlken emes, shamamen 15 pozıtsııadan turady. Mysalǵa aıta ketsek, saǵattar, turmystyq şetkalar, jasandy áshekeıler jáne basqalary kiredi. Ónim týraly málimetterdi aqparattyq bazada jınaqtaý kózdeledi. Olar tutynýshylar úshin qoljetimdi bolady. Aqparattyq resýrs naryqtaǵy jaǵdaıǵa monıtorıng júrgizýge jáne jańa ónim túrleriniń paıda bolýyna jedel den qoıýǵa múmkindik beredi. Bul rette Kelisimmen shyǵarylatyn ónimniń qaýipsizdigin bıznestiń óz erkimen qamtamasyz etýi úshin ıkemdi jaǵdaılar belgilenedi.

Qaýipsizdikti qamtamasyz etýdiń jetkilikti sharty jarııalanǵan standarttarǵa nemese synaqtardyń nátıjelerine sáıkestigi bolyp sanalady. Mundaı tásil bıznes úshin ákimshilik kedergiler týdyrmaıtynyn atap ótemiz», - dedi mınıstr.

Onyń sózine qaraǵanda, Kelisimdi iske asyrý maqsatynda tártipti retteıtin ónim aınalysy qaǵıdalarynyń jobasy ázirlendi. Osy erejelermen kásipker toltyratyn qujatty jáne joǵaryda aıtylǵandaı, osy qujat qabyldanatyn ónimder tizimin bekitý qarastyrylǵan. Qazirgi ýaqytta bul qaǵıdalar bıznes-qaýymdastyqpen jáne «Atameken» Ulttyq palatasymen talqylanýda. Jalpy alǵanda jan-jaqty túsinistik bar.

Búgingi tańda EAEO-ǵa múshe úsh memleket Kelisimdi ratıfıkatsııalaý boıynsha memleketishilik rásimderdi aıaqtady.

«Qorytyndylaı kele, kelisimdi ratıfıkatsııalaý kelesi máselelerdi sheshýdi qamtamasyz etetinin atap ótkim keledi: memleket úshin - barlyq ónimniń qaýipsiz aınalysyn qamtamasyz etýdiń quqyqtyq sharttaryna qol jetkizedi, bıznes úshin - adal kásipkerliktiń kepili bolady, tutynýshy úshin – sapaly ónimdi tańdaýǵa múmkindik beredi», - dedi Baqyt Sultanov.