Senat N. Ábiqaevty UQK basshysyna taǵaıyndaý týraly Elbasy usynysyn qoldady

ASTANA. QazAqparat - Búgin Parlament Senatynyń jalpy otyrysynda palata depýtattary Nurtaı Ábiqaevty QR Ulttyq qaýipsizdik komıtetiniń Tóraǵasy qyzmetine taǵaıyndaý týraly qaýly qabyldady.

Eske sala keteıik, Konstıtýtsııaǵa sáıkes, qaıta saılanǵan Prezıdent Ulttyq qaýipsizdik komıtetiniń tóraǵasyna kandıdatty usynyp, oǵan Parlament Senaty kelisim berýi kerek.

Osyǵan oraı, búgin Senattyń jalpy otyrysynda QR Prezıdenti Ákimshiliginiń Basshysy Nurlan Nyǵmatýlın Elbasy Nursultan Nazarbaevtyń Nurtaı Ábiqaevty UQK basshysy etip taǵaıyndaý týraly usynysyn oqyp berdi.

Palata depýtattary biraýyzdan atalǵan usynysty qoldap daýys berdi.

Eske sala keteıik, buǵan deıin N. Ábiqaev 2010 jylǵy 23 tamyzda Qazaqstan Respýblıkasynyń Prezıdenti N.Nazarbaevtyń Jarlyǵymen Qazaqstan Respýblıkasy Ulttyq qaýipsizdik komıtetiniń Tóraǵasy bolyp taǵaıyndalǵan bolatyn.

N.Á.Ábiqaev 1947 jyly 15 mamyrda Almaty oblysy, Jambyl aýyly, Jambyl aýdanynda týǵan, ekonomıka ǵylymdarynyń doktory, Reseı jaratylystaný ǵylymdary akademııasynyń akademıgi. Dıplomatııalyq rangi - Tótenshe jáne Ókiletti Elshi. Áskerı ataǵy - general-maıor. QR UQK qurmetti qyzmetkeri.

Qoǵamdyq qyzmeti: QR Voleıbol federatsııasynyń prezıdenti, QR Golf ulttyq assotsıatsııasynyń prezıdenti, Ulttyq jaratylystaný akademııasynyń prezıdenti. Nagradalary: «Qazaqstan Respýblıkasynyń Tuńǵysh Prezıdenti Nursultan Nazarbaev», «Parasat», «Orden Drýjby» (Reseı), «Orden Pocheta» (Reseı) ordenderi jáne medaldary bar.