Senat kórneki aqparat jáne dinı qyzmet máseleleri týraly qujatty Májiliske qaıtardy

NUR-SULTAN. QazAqparat – Búgin Senattyń jalpy otyrysynda «Qazaqstan Respýblıkasynyń keıbir zańnamalyq aktilerine kórneki aqparat jáne dinı qyzmet máseleleri boıynsha ózgerister men tolyqtyrýlar engizý týraly» zań jobasy eki oqylymda qaraldy. Qujatqa túzetýler engizilgendikten, zań jobasy Májiliske qaıtaryldy, dep habarlaıdy QazAqparat tilshisi.

Budan buryn habarlanǵandaı, atalǵan qujat aıasynda syrtqy jarnamalardyń qazaq tilinde durys jazylýyna ekpin qoıylyp otyr.

«Búgin qaralǵan zań jobasy aqparatqa qoljetimdilikti qamtamasyz etý maqsatymen kórneki aqparatty jazýǵa qoıylatyn talaptardy naqtylaıdy. Bul kólik jáne saýda salasynda, dári-dármekter men medıtsınalyq zattardy tańbalaýǵa, poshta qyzmetterin kórsetýge qatysty. Sonymen qatar, ákimshilik-aýmaqtyq birlikterdiń tarıhı qalyptasqan ataýlarynyń jazylýyna qoıylatyn talaptardy belgileıdi. Zań jobasy dinı bostandyq salasyndaǵy ózgeristerdi de qarastyrady. Bul rette senatorlar qujatqa ar-ojdan bostandyǵyn qamtamasyz etýge jáne dinı is-sharalar ótkizý tártibin jeńildetýge arnalǵan birqatar mańyzdy ózgerister engizdi. Bul túzetýlerge halyqaralyq sarapshylar oń baǵa berdi», - dedi Senat tóraǵasy Máýlen Áshimbaev.

Zań jobasy:

- kórneki aqparattardyń durys emes rásimdelýine, mátinderdiń bir tilde ǵana ornalastyrylýyna, durys aýdarylmaýyna qatysty tıisti talaptardyń buzylýynyń aldyn alý, qoǵamda til saıasatyna qatysty oń kózqaras qalyptastyrý;

- konfessııaaralyq kelisim jáne ózara is-qımyl jasaý úshin qolaıly jaǵdaılar týǵyzý;

- din salasynda jeke jáne zańdy tulǵalardyń quqyqtaryn qamtamasyz etý maqsatynda ázirlenip otyr.

Senator Aıgúl Qapbarovanyń aıtýynsha, zań jobasy birinshi oqylymda maquldanǵannan keıin, Komıtetpen talqylaý barysynda Májilis maquldaǵan zań jobasyna kelesi máseleler boıynsha ózgerister engizý qajettiligi týyndady:

- «dinı mazmundaǵy aqparattyq materıal» termıniniń redaktsııasyn naqtylaý, maǵynalyq jáne quqyqtyq júktemeniń bolmaýyna baılanysty anyqtamadan «mátindik siltemelerdi qosa alǵanda» degen sózderdi alyp tastaý;

- «Dinı qyzmet jáne dinı birlestikter týraly» zańda ar-ojdan bostandyǵy quqyǵyn júzege asyrý parametrlerin anyqtaý;

- ǵıbadat úılerinen (ǵımarattardan) tys ótkiziletin dinı is-sharalardy aldyn ala habarlama berý nemese bermeýi boıynsha naqtylaý, sáıkesinshe ǵıbadat etý oryndarynda, zırattar men krematorıılerde, turǵyn úılerde, qoǵamdyq tamaqtaný obektilerinde júrgiziletin dinı is-sharalar habarlanbaıtyn bolady, óıtkeni olar zańnamaǵa sáıkes kedergisiz júrgizilýge tıis;

- dinı birlestikterdiń ǵıbadat úılerinen (ǵımarattardan) tys jerlerde dinı is-sharalar ótkizý týraly habarlama berý rásimin jeńildetý.

«Atap aıtqanda, habarlama berý tártibinen qoǵamdyq tártipti saqtaýdy qamtamasyz etýge, medıtsınalyq kómekti jáne ózge de qajetti kómekti uıymdastyrýǵa járdemdesý sharalary boıynsha talaptardy, avtomobıl kóligi quraldaryn paıdalanýda olardyń sanattaryna, baǵyttyń uzyndyǵyna, bastalý jáne aıaqtalý ornyn qosa alǵanda, olardyń júrý baǵytyna qatysty talaptardy jáne dinı birlestik basshysynyń habarlamada kórsetilgen aqparattyń tolyqtyǵy boıynsha jaýaptylyǵyna qatysty talaptardy alyp tastaý syndy jeńildetý sharalary usynylady», - dedi senator.