Senat komıtetinde Qazaqstan men Belarýs arasyndaǵy kelisimdi toqtatýǵa baǵyttalǵan qujat qaraldy

ASTANA. QazAqparat - Búgin Parlament Senaty Qarjy jáne bıýdjet komıtetiniń keńeıtilgen otyrysynda «1999 jylǵy 2 aqpandaǵy QR Úkimeti men Belarýs Respýblıkasynyń Úkimeti arasyndaǵy Taýarlardy (jumystardy) eksporttaý jáne ımporttaý kezinde janama salyqtardy óndirip alýdyń prıntsıpteri týraly kelisimniń qoldanysyn toqtatý týraly Qazaqstan Respýblıkasynyń Úkimeti men Belarýs Respýblıkasynyń Úkimeti arasyndaǵy hattamany ratıfıkatsııalaý týraly» zań jobasy talqylandy.

«Qazaqstan men Belarýs eli arasyndaǵy kelisimge 1999 jyly qol qoıylǵan, bul rette qujat taýarlar men jumystardyń eksporty men ımporty barysynda janama salyqtardy ekijaqty formatta alýdy qarastyratyn bolǵan. Al keıin Kedendik odaq qurylǵaly dál osyǵan uqsas kelisim kúshine endi, sondyqtan bul qujatty toqtatqan lázim», - dedi zań jobasy boıynsha baıandaǵan Qarjy vıtse-mınıstri Ardaq Teńgebaev. Onyń aıtýynsha, Keden odaǵynda qoldanylyp júrgen Kelisim ekijaqty Kelisimde kózdelgen taýarlardy (jumystardy) eksporttaý jáne ımporttaý kezinde janama salyqtardy alý qaǵıdattaryn qamtýyna baılanysty 2011 jylǵy 8 qarashada Qazaqstan men Belarýs Respýblıkalarynyń Qarjy mınıstrlikteri ekijaqty Kelisimniń qoldanysyn toqtatý týraly Hattamaǵa qol qoıǵan.

Zań jobasy aldaǵy ýaqytta palatanyń jalpy otyrysyna shyǵarylatyn bolady.